ఏజెన్సీలో చలి పులి- విశాఖ పోర్టులో మోగిన సమ్మె సైరన్

Posted: 12/17/2013 09:31 PM IST

విశాఖ ఏజెన్సీలో పడిపోయిన కనిష్ఠ ఉష్ణోగ్రతలు స్థిరంగా ఉన్నాయి. సోమవారం కూడా లంబసింగిలో 2, చింతపల్లిలో 5 డిగ్రీల ఉష్ణోగ్రతలు నమోదయ్యాయి. పొగమంచు వర్షాన్ని తలపిస్తోంది. లంబసింగి, జీకే వీధి, చింతపల్లి ప్రజలు 24 గంటలూ చలి మంటలు వేసుకుని జీవనం సాగిస్తున్నారు. ఉత్తర, వాయవ్య భారతాల నుంచి మధ్య భారతం మీదుగా రాష్ట్రంపైకి పొడి, చలిగాలులు వీస్తుండడంతో తెలంగాణ, కోస్తా, రాయలసీమల్లో చలిగాలులు వీస్తున్నాయి. రాత్రి ఉష్ణోగ్రతలు సాధారణం కంటే మూడు నుంచి ఐదు డిగ్రీల వరకు తక్కువగా నమోదవుతున్నాయి. ఆదిలాబాద్‌లో 8 డిగ్రీల కనిష్ఠ ఉష్ణోగ్రత నమోదైంది.

 

సమ్మె సైరన్..

విశాఖ పోర్టుకు గుండెకాయలాంటి వోర్ హ్యడ్లింగ్ కాంప్లెక్స్ ను ప్రభుత్వం ప్రైవేట్ సంస్థలకు ధారాదత్తం చేసేందుకు అవగాహన ఒప్పందం కుదుర్చుకోవడాన్ని నిరసిస్తూ కార్మికులు సమ్మెకు దిగారు. ఒప్పందాన్ని రద్దు చేసుకోవాలని లేకపోతే సమ్మెను మరింత ఉధృతం చేస్తామని కార్మిక సంఘాలు హెచ్చరిస్తున్నాయి.

 

విశాఖ పోర్టు నేపథ్యం..

విశాఖ పోర్టు ఉనికిని కోల్పోవడానికి సిద్ధమవుతోంది. ప్రైవేట్ పోర్ట్ లకు ధీటుగా దేశంలో నెంబర్‌వన్‌గా నిలిచిన విశాఖ పోర్ట్ ఊపిరిని దాని పాలకులు తీసేస్తున్నారు. పోర్టు అభివృద్ధి పేరుతో అసలుకే ఎసరు పెడుతూ కార్మికుల పొట్ట కొడుతున్నారు. 26 బెర్త్ లలో ఇప్పటికే 13 బెర్త్ లను కార్పొరేట్ కంపెనీలకు ధారాదత్తం చేసిన ప్రభుత్వాలు తాజాగా ఆసియాలోనే అతిపెద్ద ఓర్ హ్యాండ్లింగ్‌ యునిట్‌ను అతి చౌకగా బేరానికి పెట్టేశాయి. పోర్టు ఆర్థికాభివృద్ధికి గుండెకాయలాంటి ఓర్‌ హ్యాండ్లింగ్‌ యూనిట్‌ను చెన్నైలోని ఓ ప్రైవేట్ కంపెనీతో కలిపేందుకు ప్రయత్నాలు ఊపందుకున్నాయి. 253 కోట్లు చెల్లిస్తే చాలు 30 సంవత్సరాల పాటు యూనిట్‌ మీదే అంటూ ఆఫర్ ఇచ్చాయి.

 

విశాఖలో ఒప్పందం జరిగితే కార్మికులు అడ్డుకుంటారన్న కారణంతో పోర్టుకు సంబంధం లేని చెన్నైలో ఒప్పందం చెయ్యడం కార్మికులను తీవ్ర ఆగ్రహానికి గురిచేస్తోంది. విశాఖ పారిశ్రామికాభివృద్ధికి ల్యాండ్ మార్క్ గా నిలిచిన పోర్టును ప్రైవేటు పరం చేయాల్సిన అవసరం ఏమొచ్చిందని కార్మికులు ప్రశ్నిస్తున్నారు. 2 వేల కోట్ల రూపాయల రిజర్వు ఫండ్స్ ఉన్నా విశాఖ పోర్టును కేంద్ర ప్రభుత్వం అమ్మేందుకు ప్రయత్నిస్తోందని కార్మికులు ఆగ్రహన్ని వ్యక్తం చేస్తున్నారు. జపాన్ ఆర్థిక సహకారంతో ఓర్ హ్యాండ్లింగ్‌ యునిట్‌ను అభివృద్ధి చేసేందుకు 2006లో టెండర్లు పిలిచి, కన్సల్టెంట్‌ దొరకలేదంటూ ప్రతిపాదనల్ని పక్కకు పెట్టిన యాజమాన్యం ఒక్కసారిగా ఇప్పుడు ఎస్ఆర్ కంపెనీకు కేటాయించడంపై విమర్శలు వెల్లువెత్తుతున్నాయి.