ప్రైవేటు ఆసుపత్రులు బంద్-పోలీసులు బెదిరిస్తున్నారు

Posted: 10/05/2013 08:25 AM IST

ప్రైవేటు ఆసుపత్రులు బంద్..

సీమాంధ్రలోని ప్రజలకు ఎలాంటి భరోసా కల్పించకుండానే కేంద్ర ప్రభుత్వం తెలంగాణ నోట్ ప్రవేశ పెట్టడం వల్ల సీమాంధ్ర ప్రజలు ఆగ్రహం వ్యక్తం చేస్తున్నారు. శనివారం సీమాంధ్రలోని ప్రైవేటు ఆసుపత్రుల బంద్ పాటిస్తున్నట్లు సమైక్యాంధ్ర వైద్యుల జేఏసీ పేర్కొంది. బంద్ నుండి అత్యవసర సేవలను మినహాయిస్తున్నట్లు, త్వరలో 'సీమాంధ్ర డాక్టర్ల చలో ఢిల్లీ' కార్యక్రమంలో వైద్యులు పెద్ద ఎత్తున్న పాల్గొననున్నారని పేర్కొన్నారు. రాష్ట్రాన్ని సమైక్యంగానే ఉంచుతామని కేంద్రం ప్రకటించేంత వరకు తమ నిరసనలు కొనసాగుతాయని సమైక్యాంధ్ర వైద్యుల జేఏసీ స్పష్టం చేసింది.

 

బెదిరిస్తున్నారు ….

శాంతియుతంగా నిరసన తెలుపుతుంటే పోలీసులు బెదిరిస్తున్నారని విద్యుత్ ఉద్యోగులు ఆరోపించారు. రాష్ట్ర విభజన నిర్ణయానికి నిరసనగా విద్యుత్ ఉద్యోగుల మెరుపు సమ్మెతో విజయవాడ సమీపంలోని ఎన్టీటీపీఎస్ లో 1260 మెగవాట్ల సామర్థ్యం గల 6 యూనిట్లలో విద్యుత్ ఉత్పాదన నిలిచిపోయిన విషయం తెలిసిందే. శనివారం విద్యుత్ జేఏసీ నేతలు మాట్లాడుతూ తాము శాంతియుతంగా సమ్మె చేస్తుంటే పోలీసులు తమను బెదిరిస్తున్నారని ఆరోపించారు. ఇక్కడున్న టెంట్ తీసేయాలని, విధులకు హాజరయ్యే వారిని బెదిరించవద్దని పోలీసులు పేర్కొన్నట్లు తెలిపారు. తాము ఎవరినీ బెదిరించడం లేదని, టెంట్ వేసుకుని శాంతియుతంగా నిరసన తెలియచేస్తున్నామన్నారు.

 

సమ్మె చేయడంతో సుమారు 1200 మెగావాట్ల విద్యుత్ ఉత్పత్తి నిలిచిపోయిందని, ఏడో యూనిట్ సర్వీస్ కూడా ట్రిప్ అయ్యే అవకాశం ఉందని తెలిపారు. కొంతమంది ఉద్యోగస్తులను బెదిరించినట్లు తమపై పోలీసులు కేసులు నమోదు చేశారని ఉద్యోగులు ఆరోపించారు. వెంటనే విభజన ప్రక్రియను వెనక్కి తీసుకోవాలని విద్యుత్ ఉద్యోగులు డిమాండ్ చేశారు. మెరుపు సమ్మె చేయడం వల్ల ఆరు జిల్లాలకు విద్యుత్ అంతరాయం ఏర్పడింది. పలు ప్రాంతాల్లో విద్యుత్ సరఫరా కావడం లేదు. జిల్లాలోని గుణదల, తాళ్లపల్లి విద్యుత్ సబ్ స్టేషన్ లలో సరఫరాను నిలిపివేశారు.