రాష్ట్రాన్ని విభజిస్తే వందేళ్లు వెనక్కే.

Posted: 09/30/2013 09:16 PM IST

రాష్ట్ర విభజన నిర్ణయాన్ని వెంటనే వెనక్కి తీసుకోవాలని డిమాండ్ చేస్తూ సమైక్యవాదులు ఆందోళనలు ఉధృతంగా కొనసాగిస్తున్నారు. మానవహారాలు, వంటావార్పులు, వినూత్న నిరసనలు 62వ రోజూ జిల్లా అంతటా కొనసాగాయి. 13 జిల్లాల రవాణా ఉద్యోగుల జేఏసీ విజయవాడలో సమావేశమై ఉద్యమాన్ని ఉధృతం చేయాలని నిర్ణయించింది. రాష్ట్రాన్ని విడదీస్తే అభివృద్ధి వందేళ్లు వెనక్కి పోతుందని, సీడబ్ల్యూసీ తీసుకున్న నిర్ణయాన్ని వెంటనే వెనక్కి తీసుకోవాలని సమైక్యవాదులు డిమాండ్ చేశారు. సమైక్యంగా ఉంటేనే అభివృద్ధి సాధ్యమని స్పష్టం చేశారు. సమైక్యాంధ్ర ఉద్యమం 62వ రోజైన కూడా జిల్లా వ్యాప్తంగా పెద్ద ఎత్తున ఆందోళనలు జరిగాయి. మైలవరంలో సహస్ర సకల జనుల నిరాహార దీక్ష నిర్వహించారు. ప్రజలు పెద్ద ఎత్తున పాల్గొని తమ నిరసన తెలిపారు. విజయవాడలో 13 జిల్లాల రవాణా జేఏసీ సమావేశం నిర్వహించి భవిష్యత్ కార్యాచరణ ప్రణాళికలో భాగంగా ఉద్యమాన్ని ఉధృతం చేయాలని నిర్ణయించారు.