చల్లని వెదర్ లో హాట్ చికెన్ గారెలు..

Posted: 08/27/2015 01:38 PM IST

మాంసాహారులు ఎంతో ఇష్టంగా తినే చికెన్ తో రకరకాల వంటకాలు తయారుచేసుకోవచ్చు. చికెన్ పకోడీలు, బిర్యానీ, ఇంకా నోరూరించే స్పెషల్ వంటకాలు ఎన్నో వున్నాయి. పైగా.. ఈ చికెన్ తింటే ఆరోగ్యానికి ఎంతో మేలు. చికెన్.. వ్యాధినిరోధక శక్తిని పెంచడంతోపాటు గుండె ఆరోగ్యానికి మేలు చేస్తుంది. ఇటువంటి చికెన్ తో చల్లని వాతావరణంలో వేడివేడి గారెడీలు చేసుకుని తింటే.. ఆ మజాయే ఎంతో అద్భుతంగా వుంటుంది. చిన్నిపిల్లల నుంచి పెద్దలవరకు ఎంతో ఇష్టంగా తినే ఈ గారెడీల తయారీ విధానం ఎంతో సులభం. మరి.. ఎలా చేస్తారో తెలుసుకుందామా..

కావలసిన పదార్థాలు :
చికెన్ - పావు కేజీ
కోడిగుడ్డు - ఒకటి
పచ్చిమిర్చి తరుగు- ఒక టీ స్పూన్
ఉల్లి తరుగు - ఒక కప్పు
అల్లం పేస్ట్ - అర టీ స్పూన్
కొబ్బరి తురుము - ఒకటిన్నర కప్పు
పసుపు పొడి - అర టీ స్పూన్
మిరపపొడి - ఒక టేబుల్ స్పూన్
కరివేపాకు తరుగు - కాసింత
నూనె, ఉప్పు - తగినంత

తయారీ విధానం :
* ముందుగా పచ్చిమిర్చి, ఉల్లి తరుగు, కొబ్బరి తురుము, అల్లం తదితరాలను మిక్సీలో వేసి బాగా రుబ్బుకోవాలి.
* ఇప్పుడు ఓ వెడల్పాటి బౌల్‌ తీసుకుని, అందులో ఇదివరకే ఉడికించి రుబ్బుకున్న చికెన్ తోపాటు ఉల్లి ముక్కలు, కోడిగుడ్డు చేర్చి బాగా గిలకొట్టుకోవాలి.
* అనంతరం అందులోనే కరివేపాకు, పచ్చిమిర్చి చేర్చి.. మిక్సీలో రుబ్బి పెట్టుకున్న కొబ్బరి తురుము మిక్స్‌ను చేర్చాలి. ఉప్పు తగినంత చేర్చి గారెల పిండిలా సిద్ధం చేసుకోవాలి.
* మరో బాణలి తీసుకుని అందులో కాస్త నూనె వేసి వేడి చేయాలి. నూనె వేడయ్యాక గారెల్లా చికెన్ మిశ్రమాన్ని దోరగా వేపుకోవాలి. అంతే చికెన్ గారెలు రెడీ.