ప్రేమ... ప్రస్తుతకాలంలో ఇది కంప్యూటర్ లో వైరస్ పాకిపోయినట్లుగా ప్రపంచం నలుమూలలా వ్యాపించిపోయింది. 7వ తరగతి నుంచి విద్యార్థివిద్యార్థినులు ప్రేమించుకుంటున్నామంటూ తమ పెద్దలనే ఎదురిస్తుంటారు. ప్రేమిస్తున్నవారికి ఎలాగైనా దక్కించుకోవాలని తమ ఇంట్లోవున్నవారిగురించి, వారి ప్రేమను ఖాతరు చేయకుండా పారిపోతున్నారు. తల్లిదండ్రులకైతే అస్సలు ప్రాధాన్యత ఇవ్వడమే లేదు. ‘‘ఏదో మమ్మల్ని కన్నారు... పోషించి పెద్దగా చేశారు... ఇక మన పని మనది’’ అన్నట్టుగా వ్యవహరిస్తోంది నేటి యువతరం.

యువతీయువకులు ప్రేమించుకున్న వెంటనే షికార్లకు, పబ్బులకు, సినిమాలకు అంటూ అనేక చోట్ల తిరుగుతుంటారు. పెళ్లికిముందు చేయరాని అసభ్యకర ప్రవర్తనలు చేస్తూ వుంటారు. ఇక తమకు ప్రపంచంతో అస్సలు సంబంధం లేనట్టుగా తమ ఇష్టాలను విచ్ఛలవిడిగా అనుభవిస్తుంటారు. తల్లిదండ్రుల అనుమతి లేకుండానే చిన్న వయస్సులోనే పెళ్లిళ్లు కూడా చేసేసుకుంటున్నారు. ‘‘ఒకరికొకరు ప్రేమించుకుంటున్నాం కదా.. ఇక మనకు పెద్దవాళ్లతో ఎటువంటి అవసరం లేదు.. మన భవిష్యత్ ను మనమే రాసుకుందాం’’ అంటూ తప్పుడు వాగ్ధానాలు చేసుకుంటూ తమ జీవితాన్ని నాశనం చేసుకుంటున్నారు.

ప్రేమ అనేది ఒక మధురానుభూతి. ఇది కేవలం అనుభవించడమే కాదు.. నలుగురికీ పంచిపెట్టాలి. అప్పుడే దానికి తగిన గౌరవం, మర్యాద లభిస్తుంది. ప్రేమించిన తరువాత తొందరపాటు నిర్ణయాలు తీసుకోకుండా, నలుగురిని ఒప్పించి, పెళ్లి చేసుకోవడంలోనే నిజమైన ప్రేమ దాగుంటుంది. ప్రేమించిన వ్యక్తితోపాటు నలుగురూ వున్నారన్న భరోసా, ధైర్యం వుంటుంది. ఎటువంటి ఆపద వచ్చినా.. మనవాళ్లు మనకు సహాయం చేస్తారనే నమ్మకం వుంటుంది. అందులోనే ప్రేమ రహస్యం దాగుంది. కాబట్టి ప్రేమించినవాళ్లు లేచిపోకుండా, తల్లిదండ్రులను బాధపెట్టకుండా వుండాలంటే... ముందుగా మీ ప్రేమను మీ పెద్దలకు తెలియపర్చండి. వారిని ఒప్పించడానికి ప్రయత్నించండి.

ప్రేమ వివాహం కోసం తల్లిదండ్రులను ఒప్పించడానికి కొన్ని అవసరమైన సూత్రాలు :

1. ప్రేమించుకుంటున్నవాళ్లు ఎటువంటి తొందరపాటు నిర్ణయాలు తీసుకోకుండా ముందుగా మీ తల్లిదండ్రులకు ప్రశాంతంగా తెలియపరచండి. దాని గురించి వారికి కొంచెం ఆలోచించే సమయాన్ని ఇవ్వండి.

2. వారు మీ ప్రేమను ఒప్పుకుంటే ఫర్వాలేదు కానీ.. ద్వేషిస్తే మాత్రం దానికి తగ్గ ఆలోచనావిధానాన్ని మార్చుకోవాలి. అంటే.. మీ ప్రేమను వారు ఎందుకు ద్వేషిస్తున్నారు..? ఎవరిలో లోపం వుంది..? అన్న విషయాల గురించి ఆలోచించండి. వాటి గురించి మీ తల్లిదండ్రుల నుంచి తెలుసుకోవడానికి ప్రయత్నించండి.

3. ప్రేమించుకున్నవారు పరస్పర కుటుంబసభ్యులతో కలిసి మనస్సువిప్పి మాట్లాడండి. వారు మీ ప్రేమిను ఎందుకు తిరస్కరిస్తున్నారో అందరి మధ్యలోనే చర్చించుకోండి. మీరు జీవతకాలం సుఖంగా బతుకుతామనే నమ్మకాన్ని వాళ్లలో కలిగించేలా చేయండి.

4. ఒకవేళ మీ తల్లిదండ్రులు మీ ప్రేమ వివాహాన్ని అంగీకరించకపోతే.. వారిని ద్వేషించకుండా, తొందరపాటు నిర్ణయాలు తీసుకోకుండా వారికి మీ ప్రేమ గురించి అర్థమయ్యేలా ప్రయత్నించండి. ఒకరికొకరు ఎంతగా ప్రేమించుకుంటున్నారో వారికి తెలియజేయండి.

5. మీ ప్రేమ నిజమని నిరూపించడానికి మీ తల్లిదండ్రులకు అనుగుణంగా మీ ప్రేయసిని లేదా ప్రియుడిని మార్చడానికి ప్రయత్నించండి. తల్లిదండ్రులు మీకెంత ప్రాధాన్యతను ఇస్తున్నారో.. మీరు కూడా అంతే ప్రాధాన్యత వారికి ఇస్తున్నట్లు తెలియపర్చండి.

6. అనవసరమైన వాగ్ధానాలు వేయకుండా మీలో వున్న నిజ ప్రేమను వారి ముందు వ్యక్తపర్చండి. అనవసరంగా కోపాద్రిక్తులు కాకుండా ఓపికతో మీ ప్రేమ వ్యవహారాన్నితెలియజేసేలా చేయండి.

ఇలా ఈ విధంగా కొన్ని సూత్రాలను పాటిస్తే.. మీ తల్లిదండ్రులు మీ ప్రేమ వివాహానికి ఒప్పుకునే అవకాశాలున్నాయి. ఇప్పటికీ వారు మీ ప్రేమను నిరాకరిస్తే.. తొందరపాటు నిర్ణయాలతో జీవితాన్ని పాడుచేసుకోకుండా.. ఒక మంచి జీవన బాటను పట్టండి.