ఎక్కువసేపు కూర్చుంటే.. అంతే సంగతులు!

Posted: 02/21/2015 08:16 PM IST

ప్రస్తుత బిజీ ప్రపంచంలో అందరూ కంప్యూటర్ల ముందు గంటలకొద్దీ సమయాన్ని వెచ్చించి అలాగే కూర్చుండిపోతారు. ఎక్కువ పని ఒత్తిడి వుండటం వల్ల సాయంత్రం వరకు లేవకుండా కూర్చుంటారు. కానీ అలా ఎక్కువసేపు కూర్చుని వుంటే.. ప్రమాదకరమైన సమస్యలను ఎదుర్కోవాల్సి వస్తుందని నిపుణులు అంటున్నారు.

నిజానికి నిలుచుని నడుస్తున్నప్పుడు అత్యధిక కండరాలు రక్తంలోని షుగర్, కొవ్వు పదార్థాలను గ్రహిస్తాయి. తద్వారా ఆరోగ్యంగా వుంటారు. కానీ.. ఎక్కువ గంటలు కూర్చుని వుంటే.. రక్తనాళాలు తమ సహజమైన వ్యాకోచ సామర్థ్యాన్ని కోల్పోతాయి. ఇదే స్థితి ఎక్కువకాలం సాగితే.. అది శరీరంలో కొలెస్టిరాల్ నిల్వలు పెరగడానికి, మధుమేహం రావడానికి దారితీస్తుంది. అంతేకాదు.. మిగులు శక్తి అంతా కొవ్వుగా మారి రక్తనాళాలు దెబ్బతినడానికి కారణమవుతుంది. చివరికి గుండె రక్తనాళాలు దెబ్బతిని గుండె సంబంధిత వ్యాధులకు దారితీస్తుంది.

ఆఫీసులో కావొచ్చు.. వ్యాపార సంస్థలో కావొచ్చు.. ఎక్కడైనా కావొచ్చు.. రోజుకు 14 గంటలపాటు కూర్చుని వుంటే గుండె జబ్బులు ఖచ్చితంగా వస్తాయని, అలాగే పైన తెలిపిన సమస్యలు ఎదురవుతాయని నిపుణనులు అంటున్నారు. కేవలం గుండెజబ్బులు, పక్షవాతాలే కాకుండా క్యాన్సర్ బారిన పడే అవకాశాలున్నాయని వైద్యులు అంటున్నారు. కాబట్టి.. నిత్యం కూర్చుని పనిచేయడం కంటే.. గంటకోసారి 10 నిముషాల విరామం ఇవ్వడం మంచిది.