పుదీనా చాయ్ తాగండి.. గొంత సమస్యకు చెక్ పెట్టండి!

Posted: 02/12/2015 04:08 PM IST

పుదీనాలో ఎన్నోరకాల పోషక విలువలు నిల్వవుంటాయి. ముఖ్యంగా ఇది శరీరలంలోని మలిన పదార్థాలను పూర్తిగా శుభ్రపరచడంలో కీలకపాత్ర వహిస్తుందని ఆరోగ్య నిపుణులు తమ పరిశోధనల ద్వారా వెల్లడించారు. అలాగే.. జీర్ణక్రియ, కడుపునొప్పి ఇతరత్ర సమస్యలతో పోరాడటం, శక్తిని పెంచడం వంటి గుణాలు ఇందులో పుష్కలంగా వుంటాయని వారు పేర్కొంటున్నారు. ఇక గొంతు సమస్యను చెక్ పెట్టడంలో ఇది ఎంతగానో సహాయపడుతుందని నిపుణుల విశ్లేషణ! నిజానికి గొంతు నొప్పిని నివారించేందుకు ఎన్నోరకాల మందులు, ఇతర ప్రోడక్ట్ లు అందుబాటులో వున్నాయి కానీ.. పుదీనా ముందు అవన్నీ వేస్టేనని చెబుతున్నారు.

పుదీనాలో మెంతాల్ డీకెంజెస్టంట్ అనే పోషకం వుంటుంది. ఇది గొంతులో గరగర వంటి ఇబ్బందులను దూరం చేయడంలో కీలకపాత్ర పోషిస్తుంది. దీంతో పుదీనా చాయ్ తాగితే గొంతు నొప్పిని, గరగర సమస్యలను పూర్తిగా అధిగమించవచ్చునని నిపుణులు స్పష్టం చేస్తున్నారు. తద్వారా నాసల్ పాసేజ్ ఫ్రీ అవుతుంది. అంతేకాదు.. కాలేయాన్ని శుభ్రం చేయడంలోనూ ఈ పుదీనా ఎంతో సహాయపడుతుంది. అలాగే రెగ్యులర్ డైట్’లో పుదీనా తీసుకుంటే జీర్ణక్రియ మెరుగుపడుతుంది. రెండు స్పూన్ల పుదీనా ఆకు రసంలో కొద్దిగా తేనె కలిపి రోజు మూడుసార్లు సేవిస్తే.. కడుపునొప్పి, పొట్ట ఉబ్బరం వంటి సమస్యలు త్వరగా తగ్గుముఖం పడుతాయని అంటున్నారు.

ఈ పుదీనా ఆకుల్లో విటమిన్ ఏ, విటమిన్ సి గుణాలు అధిక మోతాదులో నిల్వవుంటాయి. ఇవి శరీరంలో వ్యాధినిరోధక శక్తిని పెంచడంలో తమవంతు సహాయాన్ని అందిస్తాయి. ఇటువంటి పోషకాలు కలిగిన పుదీనాతో ఉదయాన్నే టీ చేసుకుని తాగితే.. శరీర పనితీరు మెరుగవుతుందని ఆరోగ్య నిపుణులు అంటున్నారు. చిరుజబ్బులు వెంటనే నయమవుతాయని, నిత్యం హుషారుగా వుంటారని, మెదడు ఫ్రెష్ గా వుంటుందని నిపుణులు అంటున్నారు.