ఇలా చేయండి వారం రోజుల్లోనే బరువు తగ్గండి

Posted: 12/18/2014 04:20 PM IST

Fat heavy weight obesity controlling simple tips

ఊబకాయం, స్థూలకాయం పేరేదైనా అర్థం మాత్రం అధిక బరువు అనే వస్తుంది. ప్రపంచానికే సవాలుగా మారిన ఈ సమస్యను సులువైన చిట్కాల ద్వారా అధిగమించవచ్చు. బరువు తగ్గాలనే తపన.., సరైన సమయపాలన పాటించి కింది చిట్కాలు ప్రయోగిస్తే కేవలం వారం రోజుల్లోనే బరువు తగ్గుతారు. ఇక ఎక్కువ సేపు వెయిట్ చేయకుండా ఆ చిట్కాలేమిటో చూసేయండి. చిన్న సలహా ఏమిటంటే.., మీరు ఉండాల్సిన దానికంటే ఎంత ఎక్కువగా ఉన్నారో చూడండి, ఆ తర్వాత అధిక బరువు తగ్గించేందుకు ప్రయత్నించండి.

డే1 : తాజా పండ్లను తినాలి. అయితే అరటిపండును మాత్రం వదిలేయండి. ముఖ్యంగా నీళ్ళు ఎక్కువగా ఉండే పుచ్చకాయలు, నారింజ, బత్తాయి (కాలాన్ని బట్టి దొరికే పండ్లు) తీసుకోవటం ఉత్తమం. తొలి రోజు కాబట్టి ఎలాంటి పరిమితి లేదు. సంతోషంగా ఇష్టం వచ్చినన్ని పండ్లు తినండి.

డే2 : తొలిరోజు పండ్లు తిన్నారు కాబట్టి.., రెండవ రోజు కూరగాయలు తీసుకొండి. పచ్చి కూరగాయలు లేదా ఉడికించినవి తినవచ్చు కానీ., కూరగాయలను వేయించుకుని తింటే చేస్తున్న వ్రత ఫలం చెడినట్లే. కాబట్టి నూనె జోలికి అసలు వెళ్లకండి. బంగాళదంప ఉడికించి టిఫిన్ చేయండి.., దోసకాయ, క్యారెట్, బీట్ రూట్, సొరకాయ, కాస్త కఠినమైనా తప్పదు అనకుని కాకరకాయ తీసుకొండి.

డే3 : తొలిరోజు అరటి వదిలేసినట్లే.., మూడవ రోజు ఆలుగడ్డను వదిలేయండి. ఇవి తప్ప మిగిలిన పండ్లు, కూరగాయలు తినండి.

డే4 : అరటిపండ్లు అంటే ఇష్టమైనవారికి ఇది పండగ రోజు లాంటిది. మూడురోజులు దూరంగా పెట్టిన బనానాను ఈ రోజు తినవచ్చు. మీకు సరిపడినన్ని అరటిపండ్లు, పాలు తాగండి. ఆకలిగా ఉంటే కూరగాయలు తినండి.., బోర్ కొడితే వాటినే జ్యూస్ చేసుకుని తాగండి.

డే5 : తెలుగు వారు ఎక్కువగా తినేది అన్నమే. అలాంటి పరబ్రహ్మ స్వరూపంను ఇన్నిరోజులు దూరం చేసినందుకు క్షమించండి. ఐదవ రోజు అన్నం తినవచ్చు. అయితే కేవలం ఓ కప్పు మాత్రమే తీసుకొండి. కూరగాయలు లేదా ఆకుకూరలతో వండిన కూర అయినా సరే కానీ..., మొదటగా చెప్పినట్లు నూనె వేస్తే మొదటికే మోసం వస్తుంది జాగ్రత్త. ఈ రోజు టిఫిన్ గా టమాటాలు తినవచ్చు. గింజలు తింటే కిడ్నీలో రాళ్ళు వస్తాయనే భయం, సందేహం ఉంటే గింజలు తీసేసి తినండి.

డే 6 : ఉదయం పచ్చి కూరగాయలతో టిఫిన్..., మధ్యాహ్నం ఒక కప్పు అన్నం, ఆయిల్ వేయకుండా వండిన కూరతో భోజనం. కప్పు సరిపోతుందా అని సందేహం అవసరం లేదు. ఎందుకంటే మీ శరీరం అప్పటికే అన్నం వద్దనేట్లుగా మారిపోతుంది.

డే 7 : చివరిదైన ఈ రోజున మీరు నిర్మొహమాటంగా అన్నం, కూరగాయలు తినవచ్చు. అదనంగా జ్యూస్ కూడా తాగాలనకుంటే తాగేయండి. ఉదయం కూరగాయలు. మధ్యాహ్నం కప్పు అన్నం, నూనెలేని కూర, సాయంత్రం అలవాటు ఉంటే లేదా రాత్రి జ్యూస్ తాగండి. వద్దు అనుకుంటే కూరగాయలే తినవచ్చు. అయితే జ్యూస్ లో చక్కెరను వేయకపోటం ఉత్తమం. తప్పదనుకుంటే కాస్త వేయండి.

ఆఫీసుకు, కాలేజీలకు వెళ్తూనే ఈ చిట్కాలను ఆదివారం మొదలు పెట్టి శనివారం తో ముగించుకుని తిరిగి సోమవారం మళ్ళీ ఆఫీసు/కాలేజీకి వెళ్ళండి. మీరు బరువు తగ్గారో లేదో మీ సన్నిహితులే చెప్తారు.