కరివేపాకులో అద్భుత ఔషధగుణాలు

Posted: 12/05/2014 03:11 PM IST

ఆహారావంటకాల్లో ప్రత్యేక రుచిని తెచ్చే కరివేపాకులో మానవ శరీరానికి అవసరమయ్యే ఎన్నో ఔషధగుణాలు పుష్కలంగా వుంటాయి. ఈ ఆకులో కాల్షియం, ఫాస్ఫరస్, ఐరన్, యాంటీ ఆక్సిడెంట్లూ, బి విటమిన్, కెరోటిన్, ప్రొటీన్లు, కొవ్వు పదార్ధాలు, పిండి పదార్ధాలు, పీచు పదార్ధాలు, ఖనిజ లవణాలు, క్యాలరీలు తదితర గుణాలు వున్నాయి. అందుకే.. దీనిని అన్నివంటకాల్లో వాడినప్పుడు అది ఎంతో ప్రత్యేకంగా అనిపిస్తుంది. ఇన్ని ఔషధగుణాలు కలిగిన ఈ కరివేపాకును రెగ్యులర్ ఆహారపదార్థాల్లో తీసుకుంటే.. ఎన్నో అనారోగ్యాలబారి నుంచి తప్పించుకోవచ్చు.

1. అజీర్ణం : జీర్ణక్రియ సమస్యతో బాధపడేవారు కరివేపాకు ఆకులను, జీలకర్రతో కలిపి బాగా నూరుకోవాలి. అలా నూరగా వచ్చిన పొడిని పాలలో కలుపుకుని తాగాలి. ఇలా ప్రతిరోజూ తీసుకుంటే అజీర్ణం సమస్య నుండి త్వరగా ఉపశమనం పొందవచ్చు.

2. కొలెస్టరాల్ : కరివేపాకు ముద్దను నిత్యం టీస్పూన్ మోతాదుగా తీసుకుంటే.. క్రమంగా అనవసరమైన కొలెస్ట్రరాల్ శాతం తగ్గటంతోపాటు హానికరమైన ఎల్.డి.ఎల్. కూడా గణనీయంగా తగ్గుతుంది.

3. బ్లడ్ ప్రెజర్ (బీపీ) : కరివేపాకు పళ్లను లేదా చెట్టు బెరడును కషాయంగా కాచి తీసుకుంటే అధిక రక్తపోటు వల్ల వచ్చే రుగ్మతలు తగ్గుతాయి.

4. మూత్ర పిండాల సమస్యలు : కరివేపాకు వేరు రసాన్ని ప్రతిరోజూ రెండు పూటలా టీస్పూన్ మోతాదుగా తీసుకుంటూ ఉంటే మూత్ర పిండాల సమస్యలు తగ్గుతూ వస్తాయి. కరివేపాకు ప్రతిరోజూ క్రమం తప్పకుండా ఆహారంలో స్వీకరిస్తే మూత్ర సంబంధిత వ్యాధులు తొలగిపోతాయి.

5. దురదలు : ఎండబెట్టిన కరివేపాకును, పసుపును సమపాళ్లలో తీసుకొని పొడిమాదిరిగా కలుపుకోవాలి. వస్తగ్రాళితం పట్టి ఒక శుభ్రమైన గాజు సీసాలో నిల్వచేసుకొని ప్రతిరోజూ ఒక టీ స్పూన్ మోతాదులో తీసుకుంటే దురదలు తగ్గుతాయి.

6. గర్భిణీ సమస్యలు : కరివేపాకు రసాన్ని పూటకు రెండు టీ స్పూన్ల మోతాదులో, అరకప్పు మజ్జిగకు చేర్చి రెండుపూటలా తీసుకుంటుంటే వికారం, వాంతులు వంటివి తగ్గుతాయి. తాజా కరివేపాకు రసం ఒక టీ స్పూన్, నిమ్మరసం ఒక టీ స్పూన్, పంచదార ఒక టీ స్పూన్ కలిపి రోజుకు రెండుసార్లు తీసుకుంటుంటే మంచి ఫలితం దక్కుతుంది.

7. కాలిన గాయాలు : చర్మంపైన కాలి బొబ్బలెక్కిన సందర్భాల్లో కరివేపాకు ఆకులను మెత్తగానూరి నెయ్యినిగాని లేదా వెన్ననుగాని కలిపి బాహ్యంగా ప్రయోగించాలి. ఇలా చేయటంవల్ల గాయాలు త్వరగా మచ్చలు పడకుండా మానుతాయి.

8. చుండ్రు : కరివేపాకు, నిమ్మ పండ్లపై వుండే తోలు, శీకాయ, మెంతులు, పెసలు... వీటిని సమభాగాలు తీసుకొని మెత్తని పొడి రూపంలో నూరుకోవాలి. ఈ మిశ్రమంలో షాంపూ పొడిగా వాడితే చుండ్రు నుంచి ఉపశమనం లభిస్తుంది.