వారానికి ఒక్కసారైనా.. చేపలు తినాల్సిందే!

Posted: 09/05/2015 11:22 AM IST

Fish recipes health benefits home remedies healthy food items

నిత్యం ఆరోగ్యంగా వుండాలంటే పౌష్టికాహారాన్ని తరచూ తీసుకోవాలి. పోషకాలు ఎక్కువగా లభ్యమయ్యే ఫ్రూట్స్, కూరగాయలు, కాయగూరలు, ఆకుకూరలు, వంటకాల సామాగ్రి.. ఇలా అన్నింటిని సరైన మోతాదులో సమయాన్ని కేటాయించుకుంటే తీసుకుంటే ఎంతో శ్రేయస్కరం. కానీ.. ప్రస్తుత ఆధునిక యుగంలో ఫాస్ట్ ఫుడ్స్, పిజ్జా, బర్గర్ వంటివాటికి అలవాటు పడటంతో.. రకరకాల రోగాల బారిన పడుతున్నారు. అందుకే.. ఆహారం చాలా జాగ్రత్తలు పాటించాలని.. పోషకాహారమే నిత్యం తీసుకోవాలని సూచిస్తున్నారు. శరీరానికి కావలసిన పోషకాలు అందించే ఆహారాల్లో చేపలు ఎంతో శ్రేయస్కరమైనవి. వీటిలో వుండే పోషకాలు రకరకాల వ్యాధుల నుంచి విముక్తి కలిగించడంతోపాటు ఆరోగ్యంగా వుంచుతాయి.

తక్షణమే కీళ్లనొప్పుల నుంచి ఉపశమనం లభించాలంటే వారానికి ఒకసారైనా చేపలు తినాలని అధ్యయనంలో తేలింది. చేపలను తినడం వల్ల పలు రకాలైన ప్రయోజనాలున్నాయి. అయితే తాజా అధ్యయనంలో తేలిన విషయమేమిటంటే.. వారానికి ఒకసారైనా చేపలను తినడం వల్ల రుమటాయిడ్‌, ఆర్థ్రరైటిస్‌ వంటి కీళ్లనొప్పుల ముప్పును సగం వరకూ తగ్గించుకోవచ్చని పరిశోధకులు చెబుతున్నారు. స్వీడన్‌కు చెందిన కరోలిన్‌స్కా ఇన్‌స్టిట్యూట్‌కు చెందిన పరిశోధకుల బృందం సుమారు 32 వేలమంది మహిళలపై అధ్యయనం చేపట్టింది. ఈ పరిశోధకుల బృందం తమ పరిశోధనకు ఎంపిక చేసుకున్న మహిళల ఆహారపు అలవాట్లను గురించి విశ్లేషించింది. వీరిలో ఒమెగా`3 కొవ్వు ఆమ్లాలను ఎక్కువగా తీసుకున్న వారిలో కీళ్లనొప్పుల ముప్పు తక్కువగా ఉన్నట్టు తేలింది.

సాల్మొన్‌, తాజా ట్యూనా వంటి చేపల్లో అధికంగా ఈ ఒమెగా`3 కొవ్వు ఆమ్లాలు లభ్యమవుతాయి. ఈ అధ్యయనంలో పాల్గొన్న మహిళల్లో 27 శాతం మంది ఈ కొవ్వు ఆమ్లాలను తక్కువగా తీసుకుంటున్నట్టు పరిశోధకులు గుర్తించారు. మొత్తంగా కీళ్లనొప్పులకు ఎక్కువగా గురయ్యే మహిళలు వారానికి ఒకసారైనా నూనెతో కూడిన చేపల్ని తినాలని పరిశోధకులు చెబుతున్నారు.