కిడ్నీలో రాళ్లను నివారించే చిట్కాలు..

Posted: 08/01/2015 06:20 PM IST

మారుతున్న జీవన విధానంలో ఆహారపు అలవాట్లు మారుతుండటంతో చాలామంది రకరకాల రోగాల బారిన పడుతుంటారు. మరికొందరిలో అయితే కిడ్నీలో రాళ్లు ఏర్పడుతుంటాయి. ఈ రాళ్లు ఎలా వస్తాయంటే.. క్యాల్షియం వంటి రసాయనాల గాఢత విపరీతంగా పెరిగిపోవడం వల్ల ఏర్పడుతాయని నిపుణులు వివరిస్తున్నారు. శస్త్రచికిత్స ద్వారా కిడ్నీలో రాళ్ల సమస్యను చెక్ పెట్టవచ్చు కానీ.. కొందరిలో మాత్రం అది అంత త్వరగా క్యూర్ కాదు. అలాంటివారు ప్రతిరోజూ నారింజ పండ్లరసం తీసుకుంటే.. ఆ సమస్య నుంచి బయటపడవచ్చునని ఆరోగ్య నిపుణులు సూచిస్తున్నారు.

నిజానికి.. ఆపరేషన్ ద్వారా ఈ రాళ్లను తొలగించినప్పటికీ తిరిగి మళ్లీ అవి ఏర్పడుతూనే ఉంటాయి. అలాంటి సమయాల్లో నారింజ పండ్లరసం తీసుకుంటే ఎంతో శ్రేయస్కరం. పొటాషియం సిట్రేట్ సప్లిమెంట్లు వాడడం ద్వారా ఈ సమస్యను కొంతవరకు నివారించవచ్చు. కానీ.. ఈ సప్లిమెంట్లు కొందరిలో జీర్ణవ్యవస్థకు సంబంధించిన దుష్ప్రభావాలను కలిగించే అవకాశాలు చాలావరకు వున్నాయి. కాబట్టి.. ఈ సప్లిమెంట్ల కన్నా సహజసిద్ధమైన సిట్రేట్‌లు లభించే సిట్రస్ ఫలాలను తీసుకోమని వైద్యనిపుణులు సూచిస్తున్నారు. అయితే మిగిలిన సిట్రస్ ఫలాల కన్నా నారింజపండ్లలోని సిట్రేట్లు మరింత సమర్ధవంతంగా పనిచేస్తాయని టెక్సాస్ యూనివర్సిటీకి చెందిన పరిశోధకుల అధ్యయనంలో వెల్లడైంది.

మూత్రం ఆమ్లత్వాన్ని తగ్గించడం ద్వారా ఈ సిట్రేట్లు రాళ్లు ఏర్పడడాన్ని పూర్తిగా నివారిస్తాయని ఆ అధ్యయనం నివేదికలో వెల్లడైనట్లు శాస్త్రవేత్తలు పేర్కొంటున్నారు. అంతేకాదు.. ఈ నారింజ పండ్లతో జీర్ణవ్యవస్థ మరింత మెరుగవడంతోపాటు మరిన్ని ఆరోగ్య ప్రయోజనాలు కలుగుతాయని అంటున్నారు. కాబట్టి.. ఈ పండ్లను రెగ్యులర్ డైట్ తోపాటు తీసుకుంటే ఆరోగ్యానికి ఎంతో శ్రేయస్కరం.