గాఢనిద్రకు ఉప్రకమించే ఫుడ్స్

Posted: 07/04/2015 12:25 PM IST

ప్రస్తుత బిజీ ప్రపంచంలో ప్రతిఒక్కరు నిద్రలేమి సమస్యతో బాధపడుతుంటారు. ఆఫీసు పనుల ఒత్తిడి, ఇంటి కార్యకలాపాలు, ఇతర ఆందోళనల కారణంగా హాయిగా నిద్రపోలేకపోతున్నారు. ఫలితంగా బరువు పెరగడం, ఆందోళన, అలసట చెందడం, ఏకాగ్రత లేకపోవడం, నిర్జీవం లేని జుట్టు, డార్క్ సర్కిల్స్, శరీరంలోని జీవక్రియలు సరిగా పనిచేయకపోవడం.. ఇంకా ఎన్నో రకాల సమస్యల్ని ఎదుర్కోవలసి వస్తుంది. కాబట్టి.. రోజుకి కనీసం 8 గంటలపాటు నిద్రపోవాలి. నిద్రలేమి సమస్యతో బాధపడుతున్నవారు గాఢనిద్రకు ఉప్రకమించాలంటే.. కొన్ని హెల్దీ ఫుడ్స్ వున్నాయి. అవేంటో తెలుసుకుందామా..

* పాలు : మెదడును శాంతపరిచి నిద్ర కలిగించే నాడీ ప్రసారకాలు (న్యూరోట్రాన్స్ మీటర్), ట్రైటోపాస్ పాల ఉత్పత్తుల్లో వుంటాయి. కాబట్టి.. ఒక గ్లాసు పాలు  ప్రతిరోజూ రాత్రి సమయంలో తీసుకుంటే ఎంతో శ్రేయస్కరం. పాలతో తయారైన అన్ని పదార్థాల్లోనూ నిద్రకు ఉప్రకమించే ట్రైటొఫాన్ ఉంటుంది.

* ఓట్ మీల్స్ : ఇందులో కరిగే పీచు, యాంటీ ఆక్సిడెంట్లు వుంటాయి. అవి చెడు కొలెస్ట్రాల్ ను తగ్గిస్తాయి. ఇందులో వుండే పీచు కడుపు బాగా నింపి త్వరగా ఆకలి కాకుండా చేస్తుంది. కనుక వెన్నతీసిన పాలలో వీటిని వేసుకుని తింటే.. నిద్ర బాగా పడుతుంది.

* బాదం : ఇందులో మెగ్నీషియం పుష్కలంగా వుంటుంది. అది గాఢనిద్రకు ఉపక్రమించేందుకు దోహదపడుతుంది. అంతేకాదు.. కండరాలు రిలాక్స్ అయ్యేలా సహకరిస్తుంది. కాబట్టి నిద్రించే ముందు వీటిని ఒక స్పూన్ ఫుల్ గా తింటే.. గాఢనిద్రలో జారుకోవచ్చు.

* అరటిపండ్లు : ఈ పండ్లలో మెగ్నీషియం, పొటాషియం ఎక్కువ మోతాదులో ఉన్నాయి. ఇవి కండరాలకు విశ్రాంతినిచ్చి చక్కని నిద్రపట్టేలా చేస్తాయి. అలాగే అరటిలో వుండే ట్రిప్టోఫాన్ అనే అమైనో యాసిడ్ శరీరంలో ప్రవేశించగానే సెరటోనిన్‌గా మారి ఒత్తిడిని తగ్గిస్తుంది. అందుకే రాత్రిపూట ఈ పండ్లను తీసుకుంటే నిద్ర బాగా పడుతుంది.

* స్వీట్ పొటాటో: ఇందులో కార్బోహైడ్రేట్స్, పొటాషియం అధికంగా వుంటాయి. అవి శరారాన్ని విశ్రాంతి పరచడంలో సహాయపడుతాయి. కాబట్టి.. నిద్రపోయే ముందు వీటిని తింటే.. గాఢనిద్రలో జారుకోవచ్చు.