Posted: 05/05/2012 10:50 AM IST

సినీనటుడిగా ఉన్న నాటినుంచే ఎన్టీఆర్‌కు జ్యోతిష్యం, సినిమాలకు ముహూర్తం నిర్ణయించిన బివి చివరికి భువనేశ్వరికి చంద్రబాబుతో వివాహ ముహూర్తం నిర్ణయించి దగ్గరుండి పెళ్లి జరిపించారు. కల్లూరు మండలం ఉలిందకొండకు చెందిన మోహన్‌రెడ్డి ఎన్‌టిఆర్ ప్రోత్సాహంతో రాజకీయాల్లోకి వచ్చారు. దివంగత ఎన్‌టిఆర్ నమ్మిన జ్యోతిష్యుడిగా పేరొంది ఆ కుటుంబానికి అత్యంత సన్నిహితుడైన బివి మోహనరెడ్డి కర్నూలు జిల్లా ఎమ్మిగనూరు ఉప ఎన్నికల్లో తన అదృష్టం పరీక్షించుకోనున్నరు.

1983లో రాజకీయ జీవితాన్ని ఉప ఎన్నికలతో ప్రారంభించి విజయం సాధించారు. 1999 ఎన్నికల వరకు 16 సంవత్సరాల పాటు ఎమ్మిగనూరు నియోజకవర్గం ఎమ్మెల్యేగా ప్రాతినిధ్యం వహించారు. 2004, 2009 ఎన్నికల్లో సమీప కాంగ్రెస్ ప్రత్యర్థి చెన్నకేశవరెడ్డి చేతిలో ఓడిపోయారు. 2004 వరకు సాఫీగా సాగిన బివి రాజకీయ జీవితం ఆ తరువాత కుంటుపడింది. ఉప ఎన్నికల్లో తన అదృష్టాన్ని మరోసారి పరీక్షించుకునేందుకు పావులు కదుపుతున్నారు. స్థానికేతరుడన్న ప్రత్యర్థుల ప్రచారం నుంచి తప్పించుకునేందుకు ఎమ్మిగనూరులో కొత్త ఇంటి నిర్మాణానికి శ్రీకారం చుట్టారు. అంతేగాక భార్య, కుమారుడితో కలిసి ఎమ్మిగనూరులోనే నివాసం ఉంటున్నారు. ఎన్టీఆర్ నమ్మిన జ్యోతిష్యుడిగా పేరుగాంచిన బివి మోహనరెడ్డిని రాజకీయ భవిష్యత్తు గురించి అడిగితే చిరునవ్వు మినహా మరేం మాట్లాడటం లేదు.