బాలీవుడ్ ఆఫర్ దక్కించుకున్న తెలుగు హీరో

Posted: 11/13/2015 12:19 PM IST

బాలీవుడ్ లో తమ అదృష్టాన్ని పరీక్షించుకోవాలని సౌత్ ఇండస్ట్రీలో వుండే నటీనటులు అనుకుంటుంటారు. అందుకే.. స్టార్ హోదాలో వున్నవారు కూడా అక్కడ ఆఫర్లు దక్కించుకోవడం కోసం నానారకాలుగా ప్రయత్నాలు చేస్తుంటారు. కానీ.. కేవలం కొంతమందికి మాత్రమే ఆ వరం లభిస్తుంది. చిన్నాపెద్దా అని తేడా లేకుండా తమ యాక్టింగ్ స్కిల్స్ తో ప్రేక్షకుల్ని మెప్పించేవారినే అక్కడి దర్శకనిర్మాతలు పరిశీలించి మరి తీసుకుంటారు. ఆ విధంగా కొంతరు సౌత్ నటీనటులు అక్కడ ఆఫర్లు దక్కించుకోగా.. తాజాగా వీరి జాబితాలో టాలీవుడ్ యంగ్ హీరో నవదీప్ చేరిపోయాడు. అవును.. ఈ కుర్ర హీరోకి బాలీవుడ్ లో తెరకెక్కుతున్న ప్రతిష్టాత్మకమైన చిత్రంలో ఓ కీలక పాత్రలో నటించే ఛాన్స్ దక్కింది.

క్రికెటర్ అజారుద్దీన్ జీవిత కథ ఆధారంగా బాలీవుడ్ లో ‘అజార్’ అనే చిత్రం తెరకెక్కుతోంది. ఇమ్రాన్ హష్మీ టైటిల్ రోల్ లో నటిస్తున్న ఈ సినిమాలో ఓ ముఖ్య పాత్రకు నవదీప్ ని ఎంచుకున్నారు. తొలుత ఈ పాత్రలో మరో స్టార్ నటుడ్ని తీసుకోవాలని యూనిట్ భావించింది కానీ.. చివరికి నవదీప్ కే గ్రీన్ సిగ్నల్ ఇచ్చేసింది. ఇక ఈ భారీ ఆఫర్ తనని వెతుక్కుంటూ రావడంతో ఒక్క క్షణం ఆలస్యం చేయకుండా నవదీప్ వెంటనే ఒప్పేసుకున్నాడు. ప్రస్తుతం ఈ సినిమా షూటింగ్ హైదరాబాదులో జరుగుతోంది. కాగా.. నవదీప్ మొదట్లో హీరోగా కొన్ని సినిమాల్లో నటించాడు. కాలక్రమంలో హీరోగా ఆఫర్లు తగ్గిపోవడంతో సెకండ్ హీరోగా, విలన్ గా కూడా నటిస్తున్నాడు. ఈ క్రమంలోనే ఈ ఆఫర్ దక్కడంతో ఫుల్ హ్యాపీగా వున్నాడు. ఈ సినిమా తర్వాత బాలీవుడ్ నుంచి మరిన్ని ఆఫర్స్ వస్తే.. వాటిని కచ్చితంగా ఒప్పుకుంటున్నానని అంటున్నాడు.

AS