మంచి మార్కులు కొట్టేసిన అక్కినేని అఖిల్

Posted: 11/12/2015 03:33 PM IST

అక్కినేని కుటుంబం నుంచి వచ్చిన కొత్త వారసుడు ‘అఖిల్’ ప్రేక్షకుల నుంచి మంచి మార్కులే కొట్టేశాడు. నటన, డ్యాన్స్, ఫైట్స్ అన్నింటిలోనూ తనకు సాటిలేరని మొదటి సినిమాతోనే నిరూపించుకున్నాడని ప్రశంసలు అందిపుచ్చుకుంటున్నాడు. ప్రస్తుతం ఇతనికి సంబంధించిన వార్తలే ఫిల్మ్ ఇండస్ట్రీలో తెగ చక్కర్లు కొట్టేస్తున్నాయి. భవిష్యత్తులో అఖిల్ కచ్చితంగా స్టార్ హీరోగా ఎదుగుతాడనే అభిప్రాయాలు వచ్చేస్తున్నాయి. ఈ హీరో నటించిన ‘అఖిల్’ సినిమా చూసిన వారంతా ఆ తరహాలోనే మాట్లాడుకుంటున్నారని సమాచారం. అక్కినేని అఖిల్ హీరోగా నటించిన తొలి చిత్రం ‘అఖిల్’ దీపావళి సందర్భంగా బుధవారం ప్రేక్షకుల ముందుకొచ్చిన విషయం తెలిసిందే.

అక్కినేని ఫ్యామిలీ నుంచి నటవారసుడిగా అఖిల్ వస్తుండటంతో ఈ సినిమాపై మొదటి నుంచి భారీ అంచనాలు నెలకొన్నాయి. పైగా.. ఎన్నో సూపర్ హిట్స్ అందించిన వినాయక్ ఈ సినిమా దర్శకత్వం వహించడంతో ఆ అంచనాలు తారాస్థాయికి చేరిపోయాయి. ఈ నేపథ్యంలో ప్రపంచవ్యాప్తంగా విడుదలైన ఈ సినిమాకి మొదటిరోజే మిశ్రమ స్పందన వచ్చింది. కానీ.. అఖిల్ నటన మాత్రం సూపర్బ్ అంటూ ప్రశంసలు దక్కుతున్నాయి. మొదటి సినిమాతోనే కథానాయకుడిగా అఖిల్ బాగానే మెప్పించాడని చిత్రం చూసిన ప్రతిఒక్కరు చెబుతున్నారు. డాన్సులు, ఫైట్లు పర్ఫెక్ట్ గా చేశాడని అంటున్నారు. ఇక యాక్టింగ్ లోనూ తనదైన శైలిలో ఆకట్టుకున్నాడని కితాబిస్తున్నారు. మొదటి సినిమాలో అఖిల్ వేగాన్ని చూస్తుంటే.. త్వరలోనే స్టార్ హీరోగా ఎదిగిపోతాడని అభిప్రాయాలు కూడా వెల్లడవుతున్నాయి.

AS