సక్సెస్ కోసం మరో ‘ప్రేమకథాచిత్రం’..?

Posted: 08/01/2015 06:07 PM IST

Naga chaitanya premam movie telugu remake rights tollywood gossips

‘జోష్’ వంటి ఎనర్జిటిక్ సినిమాతో టాలీవుడ్ కి ఎంట్రీ ఇచ్చిన నాగచైతన్యకి ఆ సినిమా కాస్త నిరాశే మిగిల్చింది. దాంతో మాస్ తరహా నేపథ్యంలో తెరకెక్కిన ఆ చిత్రానికి పూర్తి భిన్నంగా ‘ఏమాయ చేశావే’ లాంటి ప్రేమకథాచిత్రంతో ప్రేక్షకుల ముందుకొచ్చాడు. ఆ సినిమా మంచి విజయం సాధించడంతో లవర్ బాయ్ గా పేరుగడించాడు. ఇక ఆ తర్వాత వచ్చిన ‘100% లవ్’ చిత్రం లవ్ స్టోరీయే కావడంతో ‘లవర్ బాయ్’ ఇమేజ్ ఇతనికి ఫిక్స్ అయిపోయింది. కానీ.. ఆ మూవీ తర్వాత మళ్లీ ‘ధడ’, ‘బెజవాడ’, ‘ఆటోనగర్ సూర్య’ మాస్ చిత్రాలతో ముందుకురాగా.. అవి కూడా నిరాశపరిచాయి. కానీ.. లవ్ ఎలిమెంట్ తో కూడిన ‘ఒక లైలా కోసం’ మాత్రం సక్సెస్ అయింది. దీంతో ప్రేమకథా నేపథ్య చిత్రాలే తనకు సూటవుతాయని ఈ హీరో భావించినట్లున్నాడు.. అందుకే మరో లవ్ స్టోరీ చిత్రంతో ముందుకు రానున్నాడని సమాచారం.

మలయాళంలో సూపర్ హిట్ అయిన ‘ప్రేమమ్’ అనే సినిమా రీమేక్ పై చైతూ దృష్టి సారించాడని తెలుస్తోంది. ఈ సినిమా చూసిన చైతూ.. ఆ మూవీ కథపై మనసు పారేసుకున్నాడట. ఈ సినిమాను తెలుగులో తాను చేస్తే బాగుంటుందనే ఆలోచన చేస్తున్నట్లు వార్తలొస్తున్నాయి. పైగా.. ఇంతవరకు ఇతను నటించిన సినిమాల్లో ప్రేమ చిత్రాలే ఇతనికి మంచి విజయాలు సాధించిపెట్టాయి కాబట్టి.. ఈ రీమేక్ చిత్రం కూడా హిట్ ని అందిస్తుందనే నమ్మకంతో దానిని తెలుగులో రీమేక్ చేసే పనిలో పడ్డాడు. నిజానికి గతంలో ఈ సినిమా రీమేక్ రైట్స్ ని స్రవంతి రవికిషోర్ తీసుకున్నాడని, హీరోగా రామ్ చేయనున్నాడని ఆమధ్య వార్తలొచ్చాయి. కానీ.. తనకు ఆ సినిమా గురించే తెలియదని రామ్ క్లారిటీ ఇవ్వడంతో ఆ పుకార్లకు చెక్ పడింది. ఈ నేపథ్యంలోనే ‘ప్రేమమ్’ సినిమా రీమేక్ రైట్స్ విషయాన్ని త్వరగా చూడవలసిందిగా చైతే ఓ నిర్మాతకి చెప్పినట్లు ఫిలింనగర్ లో చర్చలు కొనసాగుతున్నాయి.