సాహసయాత్రలో సమరం చేయనున్న తమిళహీరో

Posted: 06/08/2015 01:37 PM IST

Hero arya taking part in an international cycling race in sweden

చిన్నసినిమాతో ఇండస్ట్రీలోకి ఎంట్రీ ఇచ్చిన హీరో ఆర్య.. అనతికాలంలోనే తనకంటూ ప్రత్యేక గుర్తింపు సాధించాడు. వైవిధ్యభరితమైన పాత్రల్లో నటిస్తూ ప్రేక్షకుల ఆదరణను పొందాడు. పెద్ద హీరోల జాబితాలో తన పేరును లిఖించుకున్నాడు. ఇలా స్టార్ హీరోగా ఎదిగిన ఈ నటుడు.. ఇప్పుడు సాహసయాత్రలో సమరం చేసేందుకు సన్నద్ధం అవుతున్నాడు. ఇంతకీ ఆ సాయసయాత్ర ఏంటని ఆలోచిస్తున్నారా? ఆ విషయం తెలియాలంటే మేటర్ లోకి వెళ్లాల్సిందే!

సాధారణంగా ఇండస్ట్రీలో వుండే ప్రతిఒక్కరికీ తమకంటూ ఏదో ఒక హాబీ ఖచ్చితంగా వుంటుంది. అంటే.. క్రీడల్లో పాల్గొనడం, సాహసయాత్రలు చేయడం, టూర్లకు వెళ్లడం, ఇంకా రకరకాల అలవాట్లు వుంటాయి. షూటింగ్ లేని సమయంలో వాళ్లు వాటిని ఆస్వాదిస్తూ వుంటారు. అలాగే తమిళ హీరో ఆర్యాకు సైక్లింగ్ అంటే ఎంతో సరదా! ఏమాత్రం ఖాళీ దొరికినా.. సైకిల్ తొక్కుతూ కాలం గడిపేస్తాడు. ఒక్కోసారి చెన్నయ్ లో షూటింగులకు సైకిల్ మీద వెళ్లిన సందర్భాలు కూడా వున్నాయి. ఇలా సైక్లింగ్ ని తన హాబీగా మార్చేసుకున్న ఈ నటుడు.. ఇప్పుడు దానిని మరింత పదును పెట్టేందుకు సైక్లింగ్ పోటీల్లో పాల్గొంటున్నాడని సమాచారం!

స్వీడన్ లో ప్రతిఏడాది సైక్లింగ్ ఈవెంట్ ని నిర్వహిస్తారు. ఈ వార్సిక ఈవెంట్ లో హీరో ఆర్య కూడా పాల్గొంటున్నాడు. ఇందుకోసం ప్రస్తుతం చాలా ప్రాక్టీస్ చేస్తున్నాడు కూడా! ఈ నేపథ్యంలోనే ఆర్య మాట్లాడుతూ.. ‘స్వీడన్ లోని మోటాలా అనే ఊర్లో ఈ సైక్లింగ్ ఈవెంట్ జరుగుతుంది. పర్వతాలు, సరస్సుల తీరం వెంబడి 300 కిలోమీటర్ల దూరాన్ని 15 గంటల్లో చేరుకోవాలి. ఓపక్క ఎదురుగాలులు, ఈదురుగాలులు వీస్తుంటాయి. వాటిని అధిగమిస్తూ సైక్లింగ్ చేయడం ఓ సాహసం’ అని అంటున్నాడు.