స్టేజీ మీద ప్రకాష్ కొత్త ప్రయోగం..

Posted: 04/27/2015 02:56 PM IST

Prakash raj stage performance kannada mantrapushpam drama updates

తమ్ముడు-అన్నయ్య, హీరో-విలన్, కొడుకు-భర్త, తండ్రి-తాత... ఇలా ఎన్నోరకాల వైవిధ్యభరితమైన పాత్రల్లో నటిస్తూ తనకంటూ ప్రత్యేక గుర్తింపు గడించాడు నటుడు ప్రకాష్ రాజ్! దక్షిణాది ఇండస్ట్రీలో మరే నటుడు ఈయనలాగా వుండరేమోనన్న విధంగా తన మార్క్ ముద్రించేసుకున్నారు. ఈ ఇమేజే ఆయన్ను మరిన్ని సినిమాల్లో నటించే అవకాశాలు తెచ్చిపెడుతోంది. అంతేకాదు.. నిర్మాత, దర్శకత్వ రంగాల్లోనూ ఈయన తనను తాను పరీక్షించుకున్నారు కానీ.. అందులో అంతగా సక్సెస్ అవ్వలేకపోయారు. అయితే.. నటుడిగా ఈయనకున్న ఇమేజ్ ని ఆ పరాజయాలు ఈయన సినీకెరీర్ ఏమాత్రం అడ్డుపడలేదు. ఇప్పటికీ బోలెడన్నీ సినిమాలతో ఫుల్ బిజీగా కాలం గడుపుతున్నారు.

ప్రస్తుతం దక్షిణాది ఇండస్ట్రీలో చాలా సినిమాలతో బిజీగా వున్న ప్రకాష్.. ఇప్పుడో కొత్త ప్రయోగానికి సమాయత్తమవుతున్నట్లు సమాచారం! ఈయన స్టేజి మీద ఎక్కి.. ఓ నాటకంలో నటించేందుకు గ్రీన్ సిగ్నల్ ఇచ్చినట్లు తెలుస్తోంది. ప్రముఖ నటుడు గిరీష్ కర్నాడ్ రాసిన ‘మంత్రపుష్పం’ అనే కన్నడ నాటకంలోనే ప్రకాష్ రాజ్ ఓ ముఖ్యపాత్రను పోషించనున్నాడు. ఈ విషయాన్ని తనే వెల్లడించాడు కూడా! శృంగారం, భక్తి రెండూ మిళితమైన ఈ కథలో కీలకమైన పూజారి పాత్రను తాను పోషిస్తున్నట్లుగా తెలిపాడు. ఇటువంటి పాత్రలో నటించేందుకు అవకాశం కల్పించిన వారికి తాను ధన్యవాదాలు తెలుపుకుంటున్నానని ప్రకాష్ పేర్కొన్నాడు.

ప్రతిరోజూ తాను చేసే కమర్షియల్ పాత్రలు, సినిమాల నడుమ ఈ నాటకం పాత్ర తనకు సేద తీరుస్తుందని ప్రకాష్ తన అభిప్రాయం వెల్లడించాడు. అప్పుడప్పుడు ఇలాంటి నాటకాల్లో నటిస్తేనే నటుడిగా తృప్తి లభిస్తుందని ఆయన అన్నారు. ఈ నాటకానికి సంబంధించిన పూర్తి వివరాలు త్వరలోనే వెల్లడికానున్నాయి.