‘ఫేక్’ రూమర్లను ఖండించిన సందీప్

Posted: 04/25/2015 04:52 PM IST

Sundeep kishan denies rumours vv vinayak samantha huge movie plan

ప్రస్తుతమున్న యువహీరోల్లో జోరుమీదున్న కథానాయకుడు ఎవరంటే ముందుగా ‘సందీప్ కిషన్’ పేరు వినిపిస్తుంది. ఎందుకంటే.. ఈ హీరో ఏడాదిలో కనీసం రెండుమూడు సినిమాలతో తెలుగు ప్రేక్షకుల ముందుకొచ్చేస్తున్నాడు. తన బాడీ లాంగ్వేజ్ కి తగిన పాత్రలను ఎంచుకోవడంతోపాటు ఫ్యామిలీ, యూత్ ని ఆకర్షించేవిధంగా ఎంటర్టైనింగ్ కథనాలతో ముందుకొస్తున్నాడు. దీంతో ఈ హీరో క్రేజ్ బాగానే పెరిగిపోయింది.

ఇదిలావుండగా.. ఈ హీరో ఇండస్ట్రీలోకి ఎంటరై 5 సంవత్సరాలు పూర్తైనట్లుగా ఇటీవలే వార్తలు వెలువడిన విషయం విదితమే! దీనిని పురస్కరించుకుని సందీప్ ఓ భారీ యాక్షన్ చిత్రానికి ప్లాన్ చేస్తున్నట్లు పుకార్లు వచ్చాయి. కమర్షియల్ దర్శకుడు వివి వినాయక్, స్టార్ హీరోయిన్ సమంతతో కలిసి ఓ భారీ యాక్షన్ చిత్రానికి ఈ యువహీరో ప్రణాళికలు చేస్తున్నట్లు ప్రచారం జరిగింది. కెరీర్ లో మరింత వేగం పుంజుకోవడం కోసం సందీప్ ఈ నిర్ణయం తీసుకున్నాడని అంతా అనుకున్నారు. అయితే.. ఆ వార్తల్లో ఏమాత్రం నిజం లేదని తాజాగా సందీప్ వెల్లడించాడు.

కొన్నిరోజుల నుంచి కొనసాగుతున్న భారీ చిత్రం ప్రచారంలో ఏమాత్రం నిజం లేదని ఈ యువహీరో తేల్చి చెప్పేశాడు. “నేను వివి వినాయక్ దర్శకత్వంలో సమంతతో కలిసి ఓ సినిమా చేస్తున్నానని వస్తున్న వార్తల్లో నిజం లేదు. అవి కేవలం తప్పుడు వార్తలు మాత్రమే. అయితే అటువంటి ఆఫర్ వస్తే మాత్రం చాలా సంతోషం” అంటూ ట్విట్టర్ వేదికగా తెలిపాడు. ఇదిలావుండగా.. సందీప్ నటించిన తాజా చిత్రం ‘టైగర్’ మే నెలలో విడుదల చేసేందుకు నిర్మాత సన్నాహాలు చేస్తున్నారు.