మొహమ్మద్ ఘిబ్రన్

Posted: 04/11/2015 12:50 PM IST

యాడ్ ఫిలిమ్స్ తో కెరీర్ ప్రారంభించిన మ్యూజిక్ డైరెక్టర్ మొహమ్మద్ ఘిబ్రన్.. తమిళంలో రెండుమూడు చిత్రాలకు సంగీతాన్ని అందించాడు. అక్కడ అవి సక్సెస్ అయిన నేపథ్యంలో టాలీవుడ్ నుంచి ఇతనికి ఆఫర్లు వచ్చాయి. ఈ క్రమంలోనే యూవీ క్రియేషన్స్ తెరకెక్కించిన ‘రన్ రాజా రన్’ సినిమా ద్వారా ఘిబ్రన్ తెలుగులో సంగీత దర్శకుడిగా ఎంట్రీ ఇచ్చాడు. ఆ సినిమాకి ఇతను అందించిన సరికొత్తగా వుండటంతో ప్రేక్షకుల ఆదరణ బాగానే లభించింది. పైగా.. ఇతని మ్యూజిక్ సినిమాకు హైప్ కావడంతో ఘిబ్రన్ క్రేజ్ ఆ ఒక్క సినిమాతోనే పెరిగింది. దీంతో యూవీ క్రియేషన్స్ అతనికి మరో అవకాశం ఇచ్చింది. ఆ సంస్థ తెరకెక్కించిన ‘జిల్’ మూవీకి ఇతనే సంగీతం అందించాడు. ఆ మూవీకి వెస్ట్రన్ మ్యూజిక్ తో అలరించాడు.

ఇదిలావుండగా.. తాజా సమాచారం ప్రకారం కొందరు తెలుగు ఫిలిం మేకర్లు రూపొందనున్న భారీ బడ్జెట్ సినిమాల కోసం మ్యూజిక్ డైరెక్టర్ గా ఘిబ్రన్ ను ఎంచుకున్నారని వార్తలొస్తున్నాయి. ప్రస్తుతమున్న ట్రెండ్ కి తగ్గట్టు ఇతను ట్యూన్స్ అందిస్తుండటంతో చాలామంది తెలుగు డైరెక్టర్లు ఇతనికోసం ప్రయత్నిస్తున్నట్లు తెలుస్తోంది. క్రేజ్ వున్న సంగీత దర్శకులకు ధీటుగా సంగీతం అందిస్తూ ముందుకు దూసుకుపోతున్న ఘిబ్రన్.. తనకు అందివస్తున్న అవకాశాలను సద్వినియోగం చేసుకుని త్వరలోనే టాప్ సంగీత దర్శకుల జాబితాలోకి చేరిపోతాడని విశ్లేషకులు అభిప్రాయపడుతున్నారు.

ప్రస్తుతం ఘిబ్రన్ చేతిలో మూడు సినిమాలు వున్నాయి. అవి కూడా లోకనాయకుడు కమల్ నటిస్తున్న ‘విశ్వరూపం 2’, ‘ఉత్తమ విలన్’, ‘పాపనాశం’ చిత్రాలు కావడం విశేషంగా మారింది. వీటిల్లో ఇప్పటికే ‘ఉత్తమ విలన్’ మూవీ పాటలు విడుదలయ్యాయి కూడా! ఆ సినిమాలోని పాటలన్నీ చాలా క్లాసిక్ గా వున్నాయని, వినసొంపుగా వున్నాయంటూ ప్రేక్షకుల నుంచి స్పందన లభిస్తోంది. ఇక రానున్న మిగతా రెండు సినిమాలకు ఘిబ్రన్ సంగీతం ఎలా వుంటుందోనన్న ఆసక్తి నెలకొంది.

AS