గోపీచంద్ కల నెరవేరుతుందా..?

Posted: 04/06/2015 01:55 PM IST

‘లౌక్యం’ సినిమాతో ఫ్యామిలీ ఆడియెన్స్ ను కడుపుబ్బా నవ్వించిన టాలీవుడ్ మ్యాచో మేన్ గోపీచంద్.. ఇటీవలే ‘జిల్’ సినిమాతో జిగేల్ మనిపించాడు. ఈ సినిమా భారీ విజయం సాధించిన నేపథ్యంలో ఈ తరహా సినిమాలే చేయాలని ఫిక్స్ అయ్యాడు. దీంతో తన తదుపరి చిత్రానికి సంబంధించి చాలా జాగ్రత్తలు తీసుకుంటున్నాడు. ఈ క్రమంలోనే ఈ హీరో తన మనసులో వున్న మాటను బహిర్గతం చేశాడు.

హీరో ప్రభాస్ తో కలిసి ఓ సినిమా చేయాలనుందని గోపీచంద్ తాజాగా వెల్లడించాడు. గతంలో వీరిద్దరూ కలిసి ‘వర్షం’ సినిమాలో నటించిన విషయం తెలిసిందే! అందులో ప్రభాస్ హీరోగా నటించగా... గోపీచంద్ విలన్ గా నటించాడు. ఆ సినిమా అప్పట్లో మంచి విజయాన్ని సాధించింది. అయితే ఈ మూవీ తర్వాత గోపీచంద్ హీరోగా మారాడు. ఈ క్రమంలోనే ప్రభాస్ తో కలిసి మల్టీస్టారర్ మూవీ చేయాలనుకుంటున్నట్లు కోరిక తెలిపాడు.

ఈ నేపథ్యంలోనే గోపీచంద్ మాట్లాడుతూ.. ‘నేను, ప్రభాస్ మంచి స్నేహితులం. మా ఇద్దరికీ తగ్గ మంచి కథ దొరికితే ఓ సినిమా చేయాలని డిసైడ్ అయ్యాం. ఇప్పటికే కొన్ని కథలు విన్నాం కానీ.. సరైన కథ దొరకడం లేదు. దొరికితే.. మల్టీస్టారర్ ఖచ్చితంగా చేస్తాం’ అని తెలిపాడు. ఇక ఇటీవలే ఇతను నటించిన ‘జిల్’ సినిమా విజయం సాధించడంతో హర్షం వ్యక్తం చేశాడు. ముఖ్యంగా తన లుక్స్ కి మంచి రెస్పాన్స్ వచ్చిందన్నాడు.