రామ్ చరణ్

Posted: 03/16/2015 04:18 PM IST

Ram charan tej latest flick srinu vaitla my name is raju movie shooting starts

మెగాపవర్ స్టార్ రామ్ చరణ్.. ‘మగధీర’ సినిమాతో టాలీవుడ్ రికార్డులను బ్రేక్ చేసిన మెగాహీరో! అంతేకాదు.. వరుసగా ఇతను నటించిన నాలుగు సినిమాలు 50 కోట్ల క్లబ్బులోకి చేరడం మరో విశేషం! దీంతో ఇంతవరకు ఏ హీరో క్రియేట్ చేయని రికార్డ్ చెర్రీ తన సొంతం చేసుకున్నాడు. యాక్షన్ కథాచిత్రాలతో మాస్ ప్రేక్షకులకు దగ్గరైన ఈ నటుడు.. ‘గోవిందుడు అందరివాడేలే’ చిత్రంతో ఫ్యామిలీ ఆడియెన్స్ కి మరింత చేరువయ్యాడు. అయితే.. ఆ మూవీ యావరేజ్ టాక్ తెచ్చుకోవడంతో ఈ హీరో మరోసారి అటువంటి కథతోనే ప్రేక్షకులను అలరించేందుకు సిద్ధమవుతున్నాడు.

చెర్రీ హీరోగా శ్రీనువైట్ల దర్శకత్వంలో ఓ మూవీ తెరకెక్కనున్న విషయం తెలిసిందే! ఈ చిత్రానికి ‘మై నేమ్ ఈజ్ రాజు’ ఖరారు చేయనున్నట్లు ఇండస్ట్రీలో చర్చించుకుంటున్నారు. ఇందులో చెర్రీ మొదటిసారిగా రకుల్ ప్రీత్ సింగ్ తో జతకడుతున్నాడు. ఇదిలావుండగా.. ఈ చిత్రం రెగ్యులర్ షూటింగ్ సోమవారం ఉదయం హైదరాబాదులో మొదలైంది. ఈ షూటింగులో ప్రధాన తారాగణమంతా పాల్గొంటున్నారని ఈ మూవీ నిర్మాత డీవీవీ దానయ్య తెలిపారు. ‘నాయక్’ సినిమా తర్వాత మరోసారి చరణ్ తో చేస్తున్నందుకు తనకు ఎంతో హ్యాపీగా వుందని ఆయన స్పష్టం చేశారు.

ఇక ఈ చిత్రాన్ని తెరకెక్కిస్తున్న దర్శకుడు శ్రీనువైట్ల మాట్లాడుతూ.. యాక్షన్ అంశాలతో కూడిన ఫ్యామిలీ ఎంటర్ టైనర్ గా ఈ సినిమాని రూపొందిస్తున్నట్లుగా చెప్పారు. ఈ చిత్రం షూటింగ్ ని త్వరగా ముగించేసుకుని అక్టోబర్ 15వ తేదీన విడుదల చేసే విధంగా నిర్మాణ కార్యక్రమాలను నిర్వహిస్తున్నట్లుగా దర్శకనిర్మాతలు తెలిపారు. మరిన్ని వివరాలు త్వరలోనే వెల్లడి చేయనున్నట్లు యూనిట్ బృందం తెలిపింది.