సింధూ, శ్రీకాంత్ లకు స్పోర్ట్స్‌ పర్సన్స్‌ ‌ఆఫ్‌ ద ఇయర్ అవార్డులు

Posted: 04/02/2018 08:24 PM IST

Sindhu srikanth bag top honours at espn multi sport awards

ప్రపంచస్థాయిలో స్టార్‌ బ్యాడ్మింటన్ క్రీడాకారులుగా వెలుగొందుతున్న భారత షెటర్లు పీవీ సింధు, కిదాంబి శ్రీకాంత్‌ ఇటు దేశీయంగా అవార్డులను అందుకున్నారు. తాజాగా స్పోర్ట్స్‌ పర్సన్స్‌ ‌ఆఫ్‌ ద ఇయర్‌ అవార్డులను సింధూ, శ్రీకాంత్ లు దక్కించుకున్నారు. కాగా ఉత్తమ కోచ్ అవార్డును పుల్లెల గోపీచంద్ కైవసం చేసుకున్నారు. ఈఎస్పీఎన్ తొలిసారిగా పలు విభాగాల్లో క్రీడాకారులకు అవార్డులు ప్రకటించింది. 11 విభాగాలకు చెందిన క్రీడాకారుల ప్రతిభ ఆధారంగా ఈ అవార్డులను ప్రకటించారు.

అభినవ్ బింద్రా, సోమ్ దేవ్‌, బైచుంగ్ భూటియా, జగ్బీర్ సింగ్, రోహిత్ బ్రిజ్ నాథ్‌, వెంకటేశన్ దేవరాజన్‌, నిషా మిల్లట్‌, అపర్ణ పొపట్‌, జగదీశ్‌, మనీషా, అంజుబాబీ జార్జ్ తో కూడిన జ్యూరీ బృందం విజేతలను ఈ 11 అంశాలలో విజేతలను ప్రకటించింది. గత ఏడాది నాలుగు సూపర్ సిరీస్ టైటిళ్లు సొంతం చేసుకున్న కిదాంబి శ్రీకాంత్ కు పురుషుల విభాగంలో స్పోర్ట్స్ పర్సన్ ఆఫ్ ద ఇయర్ గా ఎంపిక చేశారు. ఇక మహిళల విభాగంలో పీవీ సింధుకు ఈ అవార్డు దక్కింది. ఇక కోచ్ విషయానికి వస్తే పుల్లెల గోపీచంద్‌ బెస్ట్‌ కోచ్‌ అవార్డును కైవసం చేసుకున్నారు.

ఆసియా కప్‌ గెలిచిన మహిళల హాకీ జట్టును ‘టీం ఆఫ్‌ ద ఇయర్‌’గా ప్రకటించారు. గత ఏడాది భారత్లో అండర్‌-17 ఫిఫా ప్రపంచకప్ లో భారత్‌ తరఫున ఏకైక గోల్ ను జీక్సన్‌ సింగ్‌ సాధించిన సంగతి తెలిసిందే. ఆన్ లైన్ పోల్ లో దీనికే ఎక్కువ మంది ఓటు వేయడంతో ‘మూమెంట్‌ ఆఫ్‌ ద ఇయర్‌’గా ఇది నిలిచింది. దీంతో మొత్తానికి పదకొండు విభాగాలకు చెందిన క్రీడాకారుల ప్రతిభ అవార్డులను ఈఎస్పీఎన్ సంస్థ వెల్లడించి అవార్డులను ప్రకటించింది.