పివీ సింధుకు స్పోర్ట్స్ మ్యాగజైన్ అవార్డు

Posted: 07/07/2017 09:53 PM IST

రియో ఒలంపిక్ రజత పతక విజేత, భార‌త ష‌ట్లర్ సంచలనం, తెలుగు బిడ్డ పీవీ సింధుకు స్పోర్ట్స్ మ్యాగజైన్ అవార్డును ప్రధానం చేసింది. అమెతో పాటుగా అతని కోచ్ గోపిచంద్ కు కూడా ముంబైకి చెందిన స్పోర్ట్స్ ఇల్లస్ట్రేటెడ్ మేగ‌జైన్ అవార్డులు ప్రదానం చేసింది. సింధుకి స్పోర్ట్స్ ప‌ర్సన్ ఆఫ్ ది ఇయ‌ర్‌, గోపిచంద్‌కి కోచ్ ఆఫ్ ద ఇయ‌ర్ అవార్డుల‌ను అంద‌జేసింది. అలాగే మాజీ స్ప్రింట‌ర్ మిల్కా సింగ్‌కు లివింగ్ లెజెండ్ అవార్డు, ఒలింపిక్ స్వర్ణ ప‌త‌క గ్రహీత అభిన‌వ్ బింద్రాకు లైఫ్‌టైమ్ అచీవ్‌మెంట్ అవార్డుల‌ను మేగ‌జైన్ ప్రక‌టించింది.

భార‌త క్రికెట్ జ‌ట్టు టెస్ట్ ఓపెనింగ్ బ్యాట్స్ మెన్ కేఎల్ రాహుల్ కు గేమ్ ఛేంజ‌ర్ ఆఫ్ ది ఇయ‌ర్ అవార్డు అందించింది. దీంతో పాటు జూనియ‌ర్ ఇండియ‌న్ హాకీ జ‌ట్టుకు టీం ఆఫ్ ద ఇయ‌ర్ అవార్డులు అంద‌జేశారు. ముంబైలో జ‌రిగిన ఈ కార్యక్రమానికి న‌టి తాప్సీ హాజ‌ర‌య్యారు. రియో ఒలింపిక్స్ లో వెండి ప‌త‌కం సాధించిన త‌ర్వాత ఈ ఏడాది ప్రథ‌మాంకంలో సింధు స‌య్యద్ మోదీ ఇంట‌ర్నేష‌న‌ల్‌, ఇండియా ఓపెన్ టైటిళ్లను సొంతం చేసుకున్న విష‌యం తెలిసిందే.