ఇరుకున పెట్టే ప్రశ్నకు సానియా తెలివైన సమాధానం

Posted: 12/07/2016 03:14 PM IST

క్రీడలతో మానసికోల్లాసంతో పాటు బుద్దిబలం కూడా పెంపోందుతుందన్న పెద్దల మాట.. భారత టెన్నిస్ దిగ్గజం సానియా మీర్జా విషయంలో అక్షరాల నిజమైంది. పాకిస్థాన్ క్రికెటర్ షోయబ్ మాలిక్ తో అరేళ్ల క్రితం అమె వివాహం జరిగిన విషయం అభిమానులందరికీ తెలిసిందే. ఆ మధ్య వీరిద్దరి మధ్య మనస్పర్థలు కూడా వచ్చాయని.. వార్తలు రాగా, అలాంటిదేమీ లేదని వారు ఖండించారు. ఆ తరువాత పాకిస్తాన్ గెలుపోందిన ఓ మ్యాచ్ సందర్భంలో భర్తతో కలసి డాన్స్ చేసింది.

ఈ విషయాన్ని పక్కనబెడితే.. తాజాగా సానియా మిర్జా ఓ టీవీ ఛానెల్ నిర్వహించే 'యాదోంకీ బారాత్' కార్యక్రమంలో పాల్గోనింది. తన స్నేహితురాలైన బాలీవుడ్ నటి పరిణీతి చోప్రాతో కలసి సానియా మీర్జా ఈ షోలో పాల్గొనింది. ఈ కార్యక్రమానికి హోస్ట్ గా వ్యవహరిస్తున్న బాలీవుడ్ డైరెక్టర్ సాజిద్ ఖాన్ నుంచి టెన్నీస్ బంతుల్లాంటి ప్రశ్నలకు అమె చకచకా బదులిచ్చింది. అయితే ఈ క్రమంలో సానియాకు ఊహించని ప్రశ్నను సంధించాడు సాజిద్ ఖాన్.

భారత్, పాకిస్థాన్ ప్రజలకు ప్రాతినిధ్యం వహిస్తున్న సానియా, షోయబ్ మాలిక్ లకు భగవంతుడి అశీర్వాదంతో పిల్లలు కలిగి పెరిగి పెద్దైన తరువాత క్రీడాకారులైతే.. వారు ఏ దేశానికి ప్రాతినిధ్యం వహిస్తారని ఆయన ప్రశ్నించారు. అయితే ఈ ప్రశను ప్రతి భారత, పాకిస్థాన్ పౌరుల తరఫున తాను అడుగుతున్నానని ముందే విన్నవించారు. ‘‘మీకు, షోయబ్ మాలిక్ కు కుమారుడు పుట్టి, ఆటగాడైతే, ఏ దేశానికి ప్రాతినిధ్యం వహిస్తాడు?" అని సాజిద్ ఖాన్ అడిగాడు. ఎవరైనా ఇలాంటి ప్రశ్నకు సమాధానాన్ని ధాటవేస్తారు.

కానీ సానియా మిర్జా మాత్రం అలా చేయలేదు.. ఏ మాత్రం కంగుతినకుండా.. అమె చాలా బోల్డుగా సమాధానాన్ని ఇచ్చింది. తాము ఎప్పుడూ ఈ విషయాన్ని గురించి అలోచించలేదని, కనీసం ఎన్నడూ చర్చించలేదని చెప్పింది. ఈ ప్రశ్నకు సమాధానం తమకు కూడా తెలియదని చెప్పింది. అయితే తమ బిడ్డ ఆటగాడే ఎందుకు కావాలి? నటుడు కావచ్చు. టీచర్ కావచ్చు, డాక్టర్ కావచ్చు కదా..? అని ఎదురు ప్రశ్నించింది. అయినా ఇది చాలా దూరంలో ఉన్న విషయం. భారతీయురాలినైనందుకు తానెంతో గర్విస్తున్నాను. పాకిస్థానీ అయినందుకు అతనూ అంతే. మేమిద్దరమూ కలిస్తే, భార్యాభర్తలమైనందుకు ఇంకా ఎంతో గర్విస్తుంటామని సానియా సమాధానం ఇచ్చింది.