రవీంద్ర జడేజాకు అర్జున.. దీపా మాలిక్ కు ఖేల్ రత్న..

Posted: 08/18/2019 12:59 AM IST

టీమిండియా ఆల్‌రౌండర్‌ రవీంద్ర జడేజా అర్జున అవార్డుకు నామినేట్‌ అయ్యాడు. ఇటీవల న్యూజిలాండ్ తో జరిగిన ప్రపంచకప్‌ సెమీస్ లో జడేజా అద్భుతంగా పోరాడిన సంగతి తెలిసిందే. 92 పరుగులకే ఆరు వికెట్లు కోల్పోయి కష్టాల్లో ఉన్న జట్టును ధోనీతో కలిసి ఆదుకున్నాడు. కానీ ఆఖర్లో జడేజా, ధోనీ ఔటవ్వడంతో ప్రపంచకప్ నుంచి టీమిండియా నిష్క్రమించింది. భారత్‌ తరఫున జడేజా 156 వన్డేలు, 41 టెస్టులు, 42టీ20లు ఆడాడు.

జస్టిస్‌ (రిటైర్డ్‌) ముకుందకమ్‌ శర్మ నేతృత్వంలోని సెలక్షన్‌ కమిటీ జడేజాతో పాటు మరో 18 మంది క్రీడాకారులను అర్జున అవార్డుకు నామినేట్‌ చేసింది. రెజ్లర్‌ బజ్‌రంగ్‌ పునియా ఖేల్‌రత్న అవార్డుకు ఎంపికైన విషయం తెలిసిందే. పునియాతో పాటు పారా అథ్లెట్‌ దీపా మాలిక్‌ కూడా రాజీవ్‌ గాంధీ ఖేల్ రత్న అవార్డుకు నామినేట్ అయ్యారు. రియో పారాలింపిక్స్ లో షాట్‌ పుట్ లో భారత్‌ తరఫున దీపా మాలిక్‌ వెండి పతాకాన్ని సాధించారు. ఆమె 2017లో పద్మశ్రీ, 2012లో అర్జున అవార్డును అందుకున్నారు.