ఐసీసీ వన్డే ర్యాంకులు: విరాట్ కోహ్లీ, రోహిత్ లు కింగులే

Posted: 11/02/2018 09:40 PM IST

వెస్టిండీస్‌తో వన్డే సిరీస్‌లో అదరగొట్టిన టీమిండియా కెప్టెన్ విరాట్‌ కోహ్లీ.. ఐసీసీ తాజాగా ప్రకటించిన వన్డే ర్యాంకింగ్స్‌లోనూ మళ్లీ కింగ్ గా నిలిచాడు వన్డే క్రికెట్‌కు సంబంధించి ఐసీసీ ప్రకటించిన తాజా ర్యాంకింగ్స్ లో బ్యాట్స్‌మెన్‌ జాబితాలో కోహ్లీ(899 పాయింట్లతో) తన అగ్రస్థానంలోనే కొనసాగుతూ సత్తాచాటాడు. కోహ్లీ ఈ ఏడాది 14వన్డే మ్యాచులాడి మొత్తం 1202పరుగులు సాధించాడు. తాజాగా వెస్టిండీస్ తో జరిగిన వన్డే సిరీస్లో మూడు శతకాలతో మొత్తం 453పరుగులు సాధించాడు.

మరోవైపు ఇదే విండీస్‌ సిరీస్‌లో రెండు శతకాలతో దూకుడు కొనసాగించిన వైస్ కెప్టెన్‌ రోహిత్‌ శర్మ(871పాయింట్లతో) కూడా తాజా ర్యాంకింగ్స్ లో రెండో స్థానంలో కొనసాగుతున్నాడు. మూడో స్థానంలో ఇంగ్లాండ్‌ క్రికెటర్‌ జో రూట్‌ ఉన్నాడు. టెస్టుల్లోనూ కోహ్లీనే అగ్రస్థానాన్ని దక్కించుకున్న సంగతి తెలిసిందే. ఇదిలా ఉండగా ఈ సిరీస్లో నామమాత్ర ప్రదర్శన చేసిన భారత ఓపెనర్‌ శిఖర్‌ ధావన్‌(767పాయింట్లతో) మాత్రం నాలుగు స్థానాలు కోల్పోయి తొమ్మిదో స్థానంతో సరిపెట్టుకున్నాడు. అయితే మిడిలార్డర్‌ బ్యాట్స్‌మెన్‌ అంబటి రాయుడు 24స్థానాలు మెరుగుపరుచుకొని కెరీర్‌లో తొలిసారిగా 48 ర్యాంకును కైవసం చేసుకున్నాడు.

బౌలర్ల విషయానికొస్తే పేసర్‌ జస్ప్రీత్‌ బుమ్రా(841పాయింట్లతో) తొలి స్థానంలో ఉండగా, రెండో స్థానంలో అఫ్గానిస్థాన్‌ స్పిన్‌ సంచలనం రషీద్‌ ఖాన్‌(788పాయింట్లు), మూడో స్థానంలో కుల్దీప్‌ యాదవ్‌(723పాయింట్లు) కొనసాగుతున్నారు. అయితే మరో భారత స్పిన్నర్‌ చాహల్(683), ఇంగ్లాండ్‌ స్పిన్నర్‌ అదిల్‌ రషీద్‌(683)తో కలిసి సమానంగా ఎనిమిదో స్థానంలో నిలిచాడు. టీమ్‌ ర్యాంకింగ్స్‌లో మాత్రం వన్డే క్రికెట్‌లో ఇంగ్లాండ్‌(126పాయింట్లతో) మొదటి స్థానంలో ఉండగా, భారత్‌(121) రెండో స్థానంలో ఉంది.