అప్ఘనిస్తాన్ తో అత్యుత్తమంగా రాణిస్తాం: అజింక్య రహానె

Posted: 06/13/2018 06:31 PM IST

Ruthless india will not take afghanistan lightly ajinkya rahane

బెంగళూరులోని చిన్నస్వామి స్టేడియం వేదికగా.. టీమిండియాతో చారిత్రక తొలి టెస్టు ఆడబోతున్న అఫ్గానిస్థాన్‌ జట్టుపై తాము అత్యుత్తమంగా రాణించేందుకు జట్టుసభ్యులంతా సిద్దంగా వున్నారని భారత జట్టు తాత్కాలిక కెప్టెన్ అజింక్య రహానె స్పష్టం చేశాడు. ఇటీవల టెస్టు హోదా దక్కించుకున్న అఫ్గానిస్థాన్‌ జట్టు టీమిండియాతో ఏకైక టెస్టు మ్యాచును ఆడనుంది. జూన్ 14న ప్రారంభం కానున్న ఈ టెస్టు లో తాము ప్రత్యర్థి జట్టును తేలిగ్గా తీసుకోవడం లేదని రహానె తెలిపాడు.

అఫ్గానిస్థాన్ జట్టు అటగాళ్లను గౌరవిస్తూనే.. నిర్ధాక్షిణ్యంగా ఆ జట్టుపై విరుచుకుపడతామని వివరించాడు. ఈ సందర్భంగా ఆయన బెంగుళూరులో మీడియాతో మాట్లాడుతూ.. తొలి టెస్టు అడుతున్నంత మాత్రాన వారిని తక్కువగా అంచనా వేయలేమని అన్నారు. అయితే వారి జట్టులో మెరుగైన స్పిన్నర్లు వున్నట్లుగానే తమ జట్టులో కూడా మంచి స్పిన్నర్లు వున్నారని చెప్పారు. వాళ్లది నాణ్యమైన జట్టు అని కితాబిచ్చారు. అయితే తమ జట్టులో కూడా అదిరిపోయే అటగాళ్లు వున్నారని చెప్పారు.

‘అఫ్గానిస్థాన్ జట్టుని మేము ఏమీ తేలిగ్గా తీసుకోవడం లేదు. వాళ్లది నాణ్యమైన జట్టు.. స్పిన్నర్లు కూడా మెరుగ్గా రాణిస్తున్నారు. ఒక టెస్టు జట్టుగా ప్రత్యర్థిని గౌరవిస్తూనే.. నిర్ణాక్షిణ్యంగా ఆడేందుకు ప్రయత్నిస్తాం. ప్రతి ఒక్కరూ తాము ఆడుతున్న జట్టే మెరుగ్గా ఉందని అనుకుంటుంటారు. కానీ.. గణాంకాలు అందరికీ తెలుసు. అశ్విన్, జడేజా, కుల్దీప్ యాదవ్ అనుభవం స్పిన్నర్లు. ఒక జట్టుగా మేము గణాంకాల్ని పట్టించుకోకుండా.. అత్యుత్తమంగా ఆడేందుకు ప్రయత్నిస్తాం’ అని రహానె వెల్లడించాడు.