అప్ఘన్ టెస్టు నుంచి షమీ అవుట్, సైనీ ఇన్..

Posted: 06/11/2018 08:08 PM IST

తన భార్య హసీన్ జహాన్ తో తనకు విభేధాలు తలెత్తినప్పటి నుంచి మ్యాచుపై టీమిండియా పేసర్ మహమ్మద్‌ షమి ఏకాగ్రత చూపలేకపోతున్నాడా.? అంటే అవునన్న సంకేతాలు వస్తున్నాయి. అయితే తన భర్తపై ఎన్నో అరోపణలు చేసి అతన్ని క్రికెట్ కు దూరం చేయాలన్న భార్య కోరిక ఫలిస్తుందన్న వాదనలు కూడా తెరపైకి వస్తున్నాయి. ఇంతకీ ఏం జరిగింది.? ఎందుకిలాంటి వ్యాఖ్యలు చేస్తున్నారనేగా మీ సందేహం. తన భర్త రెండో పెళ్లి చేసుకుంటున్నాడని మరో మారు తన భార్య అరోపణలు చేయడంతో శ్రద్ద, ధ్యాస దెబ్బతినిందా.? లేక ఏమో తెలియదు కానీ షమీ చారిత్రక అప్ఘన్ టెస్టుకు మాత్రం దూరం కానున్నాడు.

సరిగ్గా మరో మూడు రోజుల వ్యవధిలో బెంగళూరులోని చిన్నసామి స్టేడియంలో అప్ఘనిస్తాన్ తో మ్యాచు జరగనున్న క్రమంలో షమీ ఈ టెస్టుకు దూరం అయ్యాడు. అందుకు కారణాలు గాయాలో మరోటో కాదు.. ఆయన ఫిట్ గా లేకపోవడం. ఐపీఎల్ లో ఢిల్లీ డేర్ డెవిల్స్ తరపున ఆడిన ఆయన ఆ తరువాత గత నెల 31న వరల్డ్ ఎలవన్ లో కూడా అడతానని ప్రకటించినా.. అందుకు ఆయన వెళ్లలేకపోయాడు. అయితే టెస్టు నేపథ్యంలో సాగిన శిక్షణా కాలంలో ఆయన నెట్స్ లో తన ప్రతిభను కనబర్చలేకపోయాడు.

దీంతో వెంటనే రంగంలోకి దిగిన బిసిసిఐ సెలక్షన్ కమిటీ షమీ స్థానంలో నవదీప్ సైనీని ఎంపిక చేసింది. రంజీట్రాఫీలో అద్భుతంగా రాణించి.. విజయ్ హజారే ట్రోఫీలో ఆరు మ్యాచుల్లో ఎనమిది వికెట్లను పడగోట్టిన సైనీని అప్ఘన్ తో టెస్టుకు ఎంపిక చేశారు. దీంతో ఇక అప్ఘన్ తో అడే తుది జట్టును కూడా బిసిసిఐ ఖారరు చేసింది. కెప్టెన్ అజింక్య రహానే, శిఖర్ ధావన్, మురళీ విజయ్, కేఎల్ రాహుల్; చట్టేశ్వర్ పూజరా, కరుణ్ నాయర్, దినేశ్ కార్తీక్, రవించంద్రన్ అశ్విన్, రవింద్ర జెడేజా, కుల్దీప్ యాదవ్, ఉమేష్ యాదవ్, నవదీప్ సైని, హార్థిక్ పాండ్య, ఇషాంత్ శర్మ, శార్ధుల్ ఠాకూర్ ల పేర్లను ప్రకటించింది.