సొంత స్టేడియంలోని పిచ్ ను అంచనా వేయలేకపోయాం: విరాట్ కోహ్లీ

Posted: 04/16/2018 07:28 PM IST

రాజస్థాన్‌ రాయల్స్ తో జరిగిన మ్యాచులో తమ సొంత మైదానం చిన్నస్వామి స్టేడియంలోని పిచ్ స్వభావాన్ని తాము సరిగ్గా అర్థం చేసుకోలేకపోయామని రాయల్ ఛాలెంజర్స్ బెంగళూరు సారథి విరాట్‌ కోహ్లీ అన్నాడు. ఈ మ్యాచులో మొదట బ్యాటింగ్ చేసిన చేసిన రహానె బృందం 217 పరుగులు చేయగా ఛేదనకు దిగిన కోహ్లీసేన 198 చేసింది. వికెట్ ను తాము స్లోగా ఉంటుందని అంచనా వేసినట్టు విరాట్ కోహ్లీ పేర్కోన్నాడు. అయితే తొలి ఇన్నింగ్స్ లో బంతి చక్కగా బ్యాటుపైకి రావడంతో అశ్చర్యపోయామని అన్నాడు. దీంతోనే రాజస్థాన్ రాయల్స్ 200 పరుగులు సాధించిందని అభిప్రాయపడ్డారు.

అయితే టీ20 క్రికెట్ లో ఇలాంటివి సర్వసాధారణమని అభిప్రాయపడ్డ కోహ్లీ.. ఇందుకు తమ జట్టు బౌలర్లను తప్పుపట్టాల్సిందేమీ లేదని అన్నాడు. కొన్నిసార్లు ఇలా జరుగుతుంటుందని తెలిపాడు. వికెట్ పై 400 పరుగులు పారించారంటే బౌలర్లపై ఒత్తిడి అర్థం చేసుకోవచ్చు. జట్టుకు సమతూకం తేవాలని, మరొక బౌలింగ్‌ వనరు అందుబాటులో ఉంటుందని సర్ఫరాజ్ ను కాదని పవన్‌ నేగిని ఎంచుకున్నామని చెప్పాడు. చివర్లో మన్‌దీప్‌ సింగ్‌, వాషింగ్టన్‌ సుందర్‌ అద్భుతంగా ఆడటం మాకు ఆత్మవిశ్వాసాన్ని ఇచ్చింది. టాప్‌ ఆర్డర్‌ విఫలమైనా లోయర్‌ ఆర్డర్‌ ఆదుకోగలదన్న నమ్మకం కలిగిందని విరాట్ అన్నాడు.