తొలి భారత క్రికెటర్ గా రాహుల్ చెత్త రికార్డు..

Posted: 03/13/2018 06:15 PM IST

Kl rahul first indian to be dismissed hit wicket in t20is

టీ20 మ్యాచుల్లో భారత క్రికెటర్లు ఎవరూ ఇప్పటి వరకు నమోదు చేసుకోని చెత్త రికార్డును కేఎల్ రాహుల్ తన పేరున రాసుకున్నాడు. ట్రై సీరీస్ లో భాగంగా శ్రీలంకతో జరిగిన మ్యాచు లో హిట్‌ వికెట్‌ రూపంలో ఔటై.. భారత్‌ తరఫున అంతర్జాతీయ టీ20ల్లో హిట్‌ వికెట్‌ రూపంలో వెనుదిరిగిన తొలి ఆటగాడిగా రికార్డులకెక్కాడు. 10వ ఓవర్లో కుశాల్‌ మెండీస్‌ వేసిన ఐదో బంతిని ఎదుర్కొనే క్రమంలో కాస్త వెనక్కి వెళ్లాడు. ఆ సమయంలో అతడి కుడి కాలు వికెట్లను తాకడంతో బెయిల్స్‌ కిందపడ్డాయి. దీంతో రాహుల్‌ హిట్‌ వికెట్‌ రూపంలో పెవిలియన్‌ బాట పట్టాడు. ఇప్పటి వరకు అంతర్జాతీయ టీ20 క్రికెట్లో 10మంది ఆటగాళ్లు హిట్‌ వికెట్‌ రూపంలో ఔటయ్యారు.

వన్డే క్రికెట్లో ఇప్పటి వరకు 65 మంది హిట్‌ వికెట్‌ రూపంలో ఔటవ్వగా ఇందులో నలుగురు భారతీయులు ఉన్నారు. నయన్‌ మోంగియా(1995లో, పాకిస్థాన్‌పై), అనిల్‌కుంబ్లే(2003లో, న్యూజిలాండ్‌పై), సచిన్‌ తెందుల్కర్‌(2008లో, ఆస్ట్రేలియాపై), విరాట్‌ కోహ్లీ(2011లో, ఇంగ్లాండ్‌పై) వన్డే క్రికెట్లో హిట్‌ వికెట్‌గా వెనుదిరిగారు. అలాగే టెస్టుల్లో చూస్తే ఇప్పటి వరకు 158 మంది ఆటగాళ్లు ఇలా ఔటయ్యారు. భారత క్రికెట్‌ జట్టు మాజీ సారథి లాల్‌ అమర్‌నాథ్‌ చెన్నైలో వెస్టిండీస్‌తో 1949లో జరిగిన టెస్టులో హిట్‌వికెట్‌గా వెనుదిరిగాడు. భారత మాజీ ఆటగాడు మోహింద‌ర్‌ అమర్‌నాథ్‌ అయితే ఏకంగా మూడుసార్లు ఇలా ఔటయ్యాడు. అటు టెస్టుల్లోనూ, వన్డేల్లోనూ హిట్‌ వికెట్‌ రూపంలో వెనుదిరిగిన ఒకే ఒక్క భారత ఆటగాడు విరాట్‌ కోహ్లీ కావడం గమనార్హం.