నవంబర్ 1న ఢిల్లీలో జరిగే టీ-20 మ్యాచ్ తో సరి...

Posted: 10/12/2017 05:32 PM IST

Ashish nehra announces retirement from all forms of cricket

టీమిండియా వెటరన్‌ పేసర్‌ ఆశిష్‌ నెహ్రా అంతర్జాతీయ క్రికెట్ కు గుడ్ బై చెబుతాడాని సంకేతాలను వెలువరించిన రెండు రోజుల వ్యవధిలోనే ఆయన అధికారికంగా రిటైర్మెంట్ తేదీని ప్రకటించారు. నవంబర్ 1న సొంత మైదానమైన ఢిల్లీలోని ఫిరోజ్ షా కోట్లాలో న్యూజీల్యాండ్ తో జరిగే మ్యాచ్ తన ఐసీసీ కెరీర్ లోనే చివరి మ్యాచ్‌ అని చెప్పారు. రిటైర్మెంట్ అనేది తన వ్యక్తిగత నిర్ణయమని వెల్లడించిన ఆయన ఈ నిర్ణయం తీసుకునే ముందు తాను జట్టు కోచ్ రవిశాస్త్రీ, విరాట్ కోహ్లీతో కూడా చర్చించానన్నారు.

దేశం తరపున టీమిండియా క్రికెట్ జట్టుకు ఇన్నేళ్ల సుదీర్ఘ కెరీర్ లో కొనసాగడం కూడా తన అదృష్టమని చెప్పిన ఆయన అందుకు గర్వంగా ఉందన్నారు. ప్రస్తుతం టీమిండియాకు సేవలందిస్తున్న భువనేశ్వర్, బుమ్రాతో బౌలింగ్ విభాగం సమతూకంగా ఉందన్నారు. ఇంకా రెండేళ్లు ఆడమని సహచరులు కోరారని, అయితే అందుకు తాను విముఖత వ్యక్తం చేసినట్లు వెల్లడించారు. కాగా వచ్చే ఏడాది ఇండియన్ ప్రిమియర్ లీగ లోనూ నెహ్రా ఆడే అవకాశాలు కూడా తక్కువనే అంటున్నారు.

1999 లో మొహమ్మద్ అజహరుద్దీన్ కెప్టెన్సీలో అంతర్జాతీయ క్రికెట్లో అరంగేట్రం చేసిన నెహ్రా, ఇప్పటివరకు భారత్ తరపున 17 టెస్టులు, 120 వన్డేలు, 26 టీ20 మ్యాచులు ఆడాడు. టెస్టుల్లో 44 వికెట్లు, వన్డేల్లో 157, టీ20ల్లో 34 వికెట్లు తీశాడు. 2011లో వరల్డ్ కప్ గెలిచిన టీమిండియాలో కూడా నెహ్రా సభ్యుడిగా ఉన్నాడు.