క్రికెటర్ కు విశ్రాంతి కల్పించిన క్రికెట్ బోర్డు

Posted: 09/11/2017 09:07 PM IST

దేశ జాతీయ జట్టులో స్థానం దోరికితే ఎగిరి గంతేసే క్రీడాకారులు వున్న ఈ రోజుల్లో.. దేశం తరపున అడుతూ అలుపెరగని విధంగా శ్రమిస్తున్న క్రీడాకారులు కూడా వున్నారు. ఇలాంటి వారి జాబితాలో బంగ్లాదేశ్ ఆల్ రౌండర్ షకిబుల్ హసన్ కూడా వున్నాడు. వరుస మ్యాచ్ లతో పూర్తిగా అలసిపోయిన ఈ అల్ రౌండర్.. తనకు ఒక ఆరు నెలలు బ్రేక్ కావాలని కోరుతున్నారు. ఈ మేరకు రెండు రోజుల క్రితం బంగ్లాదేశ్ క్రికెట్ బోర్డు(బీసీబీ)కి షకిబుల్ లేఖ రాశారు. గత కొన్ని నెలలుగా పని ఒత్తిడితో సతమవుతున్న షకిబుల్.. దాన్ని అధిగమించడానికి సుదీర్ఘ విశ్రాంతి ఇవ్వమని  లేఖలో పేర్కొన్నారు.

అయితే ఈ విషయాన్ని బీసీబీ మీడియా కమిటీ చైర్మన్ జలల్ యూనస్ తాజాగా ధృవీకరించారు. టెస్టు క్రికెట్ నుంచి ఆరు నెలల పాటు విశ్రాంతి ఇవ్వమని షకిబుల్ అడిగారని, దానిని బంగ్లాదేశ్ క్రికెట్ బోర్డు సీరియస్ గా పరిశీలిస్తుందని, షకిబుల్ కు చిన్నపాటి విరామం ఇచ్చే అవకాశం ఉందన్నారు. అంతర్జాతీయ షెడ్యూల్ ప్రకారం ఒక ఆటగాడికి ఆరు నెలల విశ్రాంతి అంటే కష్టమన్నారు. ఇటీవల ఆస్ట్రేలియాతో జరిగిన రెండు టెస్టుల సిరీస్ లో బంగ్లాదేశ్ తొలి టెస్టును గెలిచి చరిత్ర సృష్టించిన సంగతి తెలిసిందే. ఆసీస్ పై తొలిసారి టెస్టును గెలుచుకుని బంగ్లాదేశ్ కొత్త చరిత్రను రాసింది.