లంకేయులను వెంటాడుతున్న గండం

Posted: 05/29/2016 05:35 PM IST

మూడు టెస్టుల సిరీస్లో భాగంగా ఇంగ్లండ్ తో జరుగుతున్న రెండో టెస్టులోనూ లంకేయులు విలవిల్లాడుతోంది. తొలి టెస్టులో ఫాలో ఆన్ ఆడి ఇన్నింగ్స్ తేడాతో ఓటమి పాలైన శ్రీలంక మరోసారి అదే బాటలో పయనిస్తోంది.  91/8 ఓవర్నైట్ స్కోరుతో మూడో రోజు ఆదివారం తొలి ఇన్నింగ్స్ కొనసాగించిన లంకేయులు మరో 10 పరుగులు చేసి మిగతా రెండు వికెట్లను కోల్పోయారు.  దీంతో శ్రీలంకకు ఫాలో ఆన్ తప్పలేదు.
 
శ్రీలంక ఆటగాళ్లలో కుశాల్ మెండిస్(35) ఒక్కడే కాస్త ఫర్వాలేదనిపించగా, మిగతా వారంతా ఘోరంగా వైఫల్యం చెందారు. ఇంగ్లండ్ బౌలర్లలో స్టువర్ట్ బ్రాడ్ నాలుగు, అండర్సన్, వోక్స్ తలో మూడు వికెట్లతో లంక పతనాన్ని శాసించారు. శ్రీలంక ఇన్నింగ్స్ పరాజయాన్ని తప్పించుకోవాలంటే  398 పరుగులు చేయాల్సి ఉంది. అంతకుముందు ఇంగ్లండ్ తమ తొలి ఇన్నింగ్స్‌ను 132 ఓవర్లలో 498/9 స్కోరు వద్ద డిక్లేర్ చేసింది. మొయిన్ అలీ (207 బంతుల్లో 155 నాటౌట్; 17 ఫోర్లు; 2 సిక్సర్లు) ధాటిగా ఆడి అజేయ శతకం సాధించాడు.

మనోహర్