అత్యల్ప ‘చెత్త’ రికార్డు ఇక సఫారీలదే..!

Posted: 11/27/2015 08:03 AM IST

టీమిండియాతో నాగ్ పూర్ వేదికగా కొనసాగుతున్న మూడో టెస్టులో దక్షిణాఫ్రికా చెత్త రిక్డార్డును మూట గట్టుకుంది. తొలి ఇన్నింగ్స్ లో సఫారీలు 79 పరుగులకే ఆలౌట్ కావడంతో భారత్ పై అతి చెత్త గణాంకాలను నమోదు చేశారు. అంతకుముందు భారత్ పై శ్రీలంక ఒక ఇన్నింగ్స్ లో నమోదు చేసిన అత్యల్ప స్కోరు రికార్డు సఫారీలు చెరిపేశారు. 1990వ సంవత్సరంలో చత్తీస్ గఢ్ లో భారత్ తో జరిగిన టెస్టు మ్యాచ్ లో శ్రీలంక 82 పరుగులకు ఆలౌటైంది. దీనికి మూడు పరుగుల దూరంలో నిలిచిపోయిన దక్షిణాఫ్రికా 12వ అత్యల్ప స్కోరును నమోదు చేసింది. కాగా, 1955లో ఇంగ్లండ్ తో ఆక్లాండ్ లో జరిగిన టెస్టులో న్యూజిలాండ్ ఒక ఇన్నింగ్స్ లో 26 పరుగులకు ఆలౌటై.. అత్యల్ప పరుగుల రికార్డు తన పేరున రాసుకుంది.

ఇదిలా ఉండగా ప్రస్తుత టెస్టులో టీమిండియా సరికొత్త రికార్డును నెలకొల్పింది. 37 ఏళ్ల అనంతరం ప్రత్యర్థి తొలి ఇన్నింగ్స్ లో చేసిన పరుగులను టీమిండియా తన రెండో ఇన్నింగ్స్ లో రెండు, మరి కొన్ని వికెట్లు కోల్పోయి చేరుకోవడం ఇదే ప్రథమం. అంతకుముందు 1978లో కోల్ కతాలో వెస్టిండీస్ తో జరిగిన టెస్టు మ్యాచ్ లో టీమిండియా ఈ ఘనతను అందుకుంది. దీంతో పాటు తొలి ఐదు సెషన్ లలో 25కు పైగా వికెట్లు పడటం 2007 తరువాత ఇదే తొలిసారి. దక్షిణాఫ్రికా-పాకిస్థాన్ ల మధ్య కేప్ టౌన్ లో ఈ రికార్డు నమోదు కాగా, మళ్లీ ఎనమిదేళ్ల తరువాత ఈ రికార్డు పునరావృతం అయ్యింది.

జి. మనోహర్