బాటిళ్ల రగడపై ఫ్యాన్స్ ని వెనకేసుకొచ్చిన ధోనీ

Posted: 10/06/2015 05:40 PM IST

Mahendra singh dhoni comments cricket fans throw bottles on ground during india africa t20 match

భారత్, దక్షిణాఫ్రికా రెండో టి-20 మ్యాచ్ సందర్భంగా కటక్ స్టేడియంలో ప్రేక్షకులు మైదానంలోకి బాటిళ్లు విసిరి పెద్ద రభస సృష్టించిన విషయం తెలిసిందే. భారత బ్యాట్స్ మెన్ విఫలమైనందుకు ఆగ్రహించిన ప్రేక్షకులు.. ఆ విధంగా బాటిళ్లు మైదానంలో విసిరి తమ కోపాన్ని ప్రదర్శించారు. ఈ వ్యవహారంపై మీడియా, క్రీడా రంగాలు తప్పుపట్టాయి. క్రికెట్ అభిమానులు మైదానంలో సిగ్గుమాలిన చర్యకు పాల్పడ్డారంటూ విమర్శలు గుప్పించారు. కానీ.. టీమిండియా వన్డే కెప్టెన్ ధోనీ మాత్రం ఆ సంఘటనను తేలిగ్గా తీసుకోవడమే కాకుండా దానికి పాల్పడిన అభిమానుల్ని వెనకేసుకొచ్చాడు.

కటక్లో ప్రేక్షకుల తీరు వల్ల ఆటగాళ్ల భద్రతకు హానీ కలగలేదని, ఈ సంఘటనను సీరియస్గా తీసుకోరాదని అన్నాడు. సరదా కోసమే ప్రేక్షకులు మైదానంలోకి బాటిళ్లు విసిరారంటూ తేలికపరిచే ప్రయత్నం చేశాడు. గతంలో వైజాగ్లో ఓ మ్యాచ్ను అలవోకగా గెలిచినప్పుడు కూడా ప్రేక్షకులు ఇలాగే బాటిళ్లు విసిరారని ధోనీ చెప్పాడు. సరదా కోసమే ఇలా చేశారని, ఇలాంటి ఘటనలను సీరియస్ గా పరిగణించరాదని అన్నాడు. దక్షిణాఫ్రికాతో సోమవారం జరిగిన ఈ మ్యాచ్లో భారత్ 92 పరుగులకు ఆలౌట్ కావడంతో ప్రేక్షకులు మైదానంలోకి బాటిళ్లు విసిరి అంతరాయం కలిగించారు. పైగా.. మూడు టి-20 మ్యాచుల సిరీస్ కు వారికి కైవసం అవుతోందన్న ఆగ్రహానికి గురైన ప్రేక్షకులు తమ కోపాన్ని బాటిళ్లు విసిరి ప్రదర్శించారు. ఏదేమైనా.. ఈ వ్యవహారంపై ధోనీ తెలిపిన అభిప్రాయాన్ని చాలామంది తప్పుపట్టిన కొందరు మాత్రం కూల్ గా ఆలోచించి సమాధానమిచ్చాడని పేర్కొంటున్నారు.

కానీ.. మరోవైపు ఈ ఘటనపై టీమిండియా మాజీ కెప్టెన్ గవాస్కర్ తీవ్రంగా స్పందించాడు. కటక్ బారాబతి స్టేడియంలో రెండేళ్ల పాటు అంతర్జాతీయ క్రికెట్ మ్యాచ్లు నిర్వహించకుండా నిషేధం విధించాలని గవాస్కర్ సూచించాడు. ఈ ఘటనకు పోలీసులదే బాధ్యతని అన్నాడు. కటక్కు మరో రెండేళ్ల అంతర్జాతీయ మ్యాచ్ కేటాయించకపోవడంతో పాటు ఒడిశా క్రికెట్ సంఘానికి సబ్సిడీలు ఆపేయాలని గవాస్కర్ సూచించారు.