రోహితా మజాకా.. ఢంకా బజాయించిన సచిన్

Posted: 05/26/2015 07:22 PM IST

Sachin tendulkar praises rohit sharma as future indian captain

భారత యువసంచలనం రోహిత్ శర్మ.. ఐపీఎల్-8 సీజన్ లో ముంబై ఇండియన్స్ జట్టుకు కెప్టెన్ గా వ్యవహరించిన విషయం తెలిసిందే! తొలుత వరుస పరాజయాలు ముంబై చవిచూసిన నేపథ్యంలో కెప్టెన్ రోహిత్ పై తీవ్ర విమర్శలు వెల్లువెత్తాయి. అద్భుతంగా రాణించగల ఆటగాడు ఘోరంగా విఫలమయ్యాడని అభిప్రాయాలు వెల్లడయ్యాయి. ఒక దశలో ముంబై జట్టు కనీసం ప్లేఆఫ్ కు కూడా చేరుతుందో..? లేదో..? అన్న అనుమానాలు వ్యక్తమయ్యాయి. కానీ.. అంతలోనే దశ తిరిగింది. ముంబై వరుస విజయాలు నమోదు చేసుకుంటూ.. చివరకు ట్రోఫీనే సొంతం చేసుకుంది.

ఓటమి అంచులదాకా వెళ్లి అనూహ్య విజయం నమోదు చేసుకుంది. ఈ విధంగా జట్టు పుంజుకోవడానికి కారణం రోహిత్ శర్మయేనని అతని మీద ప్రశంసల వర్షం కురిసింది. మొదట ఆ జట్టు ఓటమికి కారకుడు రోహిత్ శర్మ అని ఎవరైతే పేర్కొన్నారో.. వారే అతనిని పొగడ్తలతో ముంచెత్తేశారు. అటు ముంబై అభిమానులు సైతం రోహిత్ ని ఆకాశానికెత్తేశారు. ‘రోహితా.. మజాకా..’ అంటూ నినాదాలు చేయడం మొదలెట్టేశారు. ఇక క్రికెట్ ప్రముఖులు సైతం రోహిత్ మీద ప్రశంసల జల్లులు కురిపించేశారు. ఇప్పుడు తాజాగా మాస్టర్ బ్లాస్టర్ సచిన్ టెండూల్కర్ కూడా రోహిత్ శర్మ మీద ప్రశంసలు కురిపిస్తూ ఢంకా బజాయించేశాడు.

ముంబై ఇండియన్స్ జట్టుకు మెంటార్ గా వ్యవహరిస్తున్న సచిన్.. రోహిత్ మంచి కెప్టెన్ గా ఎదుగుతాడని అతని మీద ప్రశంసల వర్షం బాగానే కురిపించేశాడు. ఈ క్రమంలోనే సచిన్ మాట్లాడుతూ.. ‘రోహిత్ చాలా ఆత్మవిశ్వాసంతో వున్నాడు. అతడు భవిష్యత్తులో మంచి కెప్టెన్ గా ఎదుగుతాడు. ఈ ఐపీఎల్ సీజన్ లో అతను ఎన్నో సవాళ్లను ఎదుర్కొన్నాడు. వాటన్నింటికీ ఎదురొద్ది ముంబైని విజేతగా నిలిపాడు. అతడికి మంచి భవిష్యత్తు వుంది’ అని తెలిపాడు.