గంగూలీపై బాంబు పేల్చిన బీసీసీ కార్యదర్శి

Posted: 05/25/2015 06:00 PM IST

టీమిండియా మాజీ కెప్టెన్ సౌరభ్ గంగూలీ ఎంతటి అద్భుత క్రికెటరో ప్రత్యేకంగా చెప్పుకోవాల్సిన అవసరం లేదు. అతని సారథ్యంలో భారత్ ఎన్నో విజయాలను, రికార్డులను నమోదు చేసుకుంది. అటువంటి ప్లేయర్ ప్రస్తుత ఇండియా జట్టుకు కోచ్ గాగానీ, డైరెక్టర్ గాగానీ నియమితుడైతే.. ఎన్నో ప్రయోజనాలు కలుగుతాయని ఎంతోమంది ప్రముఖులు అభిప్రాయాలు వెల్లడించారు. దాదాపు దాదాయే రవిశాస్త్రి స్థానంలో డైరెక్టర్ గా ఖరారు అవుతారేమోనని అంతా భావించారు. కానీ.. ఇంతలోనే ఓ బీసీసీఐ కార్యదర్శి ఆ వార్తలపై నీళ్లు చల్లేశాడు. గంగూలీపై ఇంకా ఎటువంటి నిర్ణయం తీసుకోలేదని బాంబు పేల్చేశాడు.

గతకొన్నాళ్ల నుంచి గంగూలీని టీమిండియా డైరెక్టర్ గా గానీ, సలహా సంఘం ఛైర్మన్ గా గానీ, హై పెర్ఫార్మెన్స్ మేనేజర్ గా గానీ, చీఫ్ కోచ్ గా గానీ తీసుకునే అవకాశాలున్నాయన్న వార్తలు విస్తృతంగా వస్తున్న విషయం తెలిసిందే! ఈ క్రమంలోనే తాజాగా దీనిపై బీసీసీఐ కార్యదర్శి అనురాగ్ ఠాకూర్ స్పందించారు. ఈ వ్యవహారంపై ఆయన కోల్ కతాలో మాట్లాడుతూ.. గంగూలీ విషయమై బోర్డు ఇంకా నిర్ణయం తీసుకోలేదని స్పష్టం చేశారు. ఏ నిర్ణయం తీసుకున్నా.. భారత క్రికెట్ ప్రయోజనాలను దృష్టిలో పెట్టుకునే తీసుకుంటామని.. గంగూలీ విషయంలో నిర్ణయం తీసుకునేందుకు కొంత సమయం పడుతుందని ఆయన వెల్లడించారు.

‘గంగూలీ గొప్ప క్రికెటర్.. భారత క్రికెట్ కు అతను అందించిన సేవలు అమోఘం. అయితే.. అతని విషయంలో నిర్ణయం తీసుకునేందుకు కొద్ది సమయం పడుతుంది. ఏ నిర్ణయం తీసుకున్నా.. క్రికెట్ ప్రయోజనాలను దృష్టిలో పెట్టుకునే తీసుకుంటాం’ అని ఠాకూర్ స్పష్టం చేశారు. తాను బీసీసీఐ అధ్యక్షుడు జగ్మోహన్ దాల్మియాను కలిసేందుకు కోల్ కతా వచ్చానని పేర్కొన్న ఆయన.. బంగ్లాదేశ్ టూర్ కు ఇప్పటికే జట్టును ప్రకటించినట్లు పేర్కొన్నారు. త్వరలోనే కోచ్, సహాయక సిబ్బందిని ప్రకటిస్తామని తెలిపారు.