పసికూనలపై గెలుపుతో బోణి కోట్టిన పాక్..

Posted: 03/01/2015 07:48 PM IST

ప్రపంచ కప్ క్రికెట్ టార్నమెంటులో పేలవమైన ప్రదర్శనతో అటు స్వదేశంతో పాటు ఇటు ప్రపంచ వ్యాప్త అభిమానుల నుంచి విమర్శలను ఎదుర్కోంటున్న పాకిస్థాన్ ఎట్టకేలకు బోణీ కొట్టింది. వన్డే ప్రపంచకప్ పూల్ - బి లో భాగంగా పాకిస్థాన్-జింబాబ్వేల మధ్య మ్యాచ్ ఉత్కంఠగా సాగింది. కట్టుదిట్టమైన బౌలింగ్ తో రాణించిన పాక్ బౌలర్లు ఎట్టకేలకు జింబాబ్వేను కట్టడి చేయడంలో సక్సెస్ అయ్యారు. దీంతో.. చివరకు విజయం పాకిస్థాన్నే వరించింది. ఆదివారం జరిగిన మ్యాచ్లో పాకిస్థాన్ 20 పరుగుల తేడాతో జింబాబ్వేపై విజయం సాధించింది.
 
ముందుగా బ్యాటింగ్ చేసిన పాకిస్థాన్.. ప్రత్యర్థి జింబాబ్వే ముందు 236 పరుగుల లక్ష్యాన్ని నిర్దేశించింది. మిస్బా(73), వహాబ్ రియాజ్ (54)తో రాణించారు. వారి ఇద్దరికి తోడు ఉమర్ అక్మల్ 33 పరుగులు చేయడంతో పాక్ నిర్ణీత ఓవరల్లో 7 వికెట్లకు 235 పరుగులు చేసింది. జింబాబ్వే బౌలర్లలో చటారా మూడు, విలియమ్స్ రెండు వికెట్లు తీశారు. పాకిస్థాన్ నిర్దేశించిన లక్ష్యాన్ని ఛేదించేందుకు బరిలోకి దిగిన జింబాబ్వే ఆది నుంచే తటపటాయించింది. పాక్ పేసర్ ఇర్ఫాన్ జింబాబ్వే ఓపెనర్లతో పాటు మరో ఇద్దిరని అవుట్ చేసి జట్టు విజయంలో కీలక పాత్ర పోషించాడు. అతడికి తోడు మరో బౌలర్ రియాజ్ నాలుగు వికెట్లు తీసి జింబాబ్వేను కోలుకోలేని దెబ్బతీశాడు. జింబాబ్వే బ్యాట్స్మెన్లో టేలర్ (50), విలియమ్స్ (33), హామిల్టన్ (29) మినహా ఎవరూ రాణించలేదు. చివరలో చిగుంబర 20 చేయటంతో జింబాబ్వే స్కోరు 200 మార్కు దాటింది.

జి.మనోహర్