వాళ్ల చేతుల్లోనే నా క్రికెట్ కెరీర్ వుంది..!

Posted: 11/24/2014 07:31 PM IST

ఇటీవలే శ్రీలంకతో జరిగిన ఐదువన్డేల క్రికెట్ సిరీస్’లో భాగంగా భారత సారథిగా కొనసాగిన కోహ్లీ... తన కెప్టెన్’షిప్ ఏంటో ఆ సిరీస్’లో నిరూపించుకున్నాడు. ఒక్క మ్యాచ్ కూడా లంక చేతిలో పడనివ్వకుండా మొత్తం సిరీస్’ను కైవసం చేసుకోవడంలో విరాట్ సారథిగా నిరూపించుకున్నాడని ప్రతిఒక్కరు ప్రశంసలతో ముంచెత్తారు. అలాగే వన్డేల్లో ప్రపంచవ్యాప్తంగా బెస్ట్ ప్లేయర్’గా రెండవ స్థానాన్ని కూడా కైవసం చేసుకున్నాడు. దీంతో భారత సారథిగా ధోనీ తర్వాతి స్థానాన్ని కోహ్లీ సంపాదించుకోగలిగాడు. పైగా ధోనీ గాయపడటంతో అతని స్థానాన్ని కోహ్లీ భర్తీ చేస్తున్నాడు. ఈ సందర్భంగానే ఆస్త్రేలియాతో ఆడనున్న టెస్టు మ్యాచులకు భారత జట్టుకు నాయకత్వ బాధ్యతలు చేపట్టాడు కోహ్లీ!

ఆస్ట్రేలియా జట్టుతో ఆడనున్న క్రికెట్ సిరీస్ సందర్భంగా భారత జట్టుకు తాను కెప్టెన్’గా ఎంపిక కావడం ఎంతో సంతోషంగా వుందని తెలిపిన విరాట్... కెప్టెన్’గా తాను విజయవంతం కావాలంటే తన సహచరుల చేతుల్లోనే వుందని.. వాళ్లు సరిగ్గా ప్రదర్శించగలిగితే నా క్రికెట్ కెరీర్ ఇంకా సులువుగా సాగుతుందని పేర్కొన్నాడు. ‘‘జట్టులోని కుర్రాళ్ల సామర్థ్యం పట్ల నేనెంతో విశ్వాసంగా వున్నాను. పరిస్థితులుకు తగ్గట్లు జట్టును నడిపించడం నా బాధ్యత. ఆటగాళ్లు నాకు మద్దతుగా నిలుస్తూ.. ఆశించిన ప్రదర్శన ఇస్తే కెప్టెన్’గా నా ప్రదర్శన కూడా బాగుంటుంది’’ అని స్పష్టం చేశాడు కోహ్లీ. మరి ఈ ఆస్ట్రేలియా టూర్’లో కోహ్లీ తన కెప్టెన్’షిప్’ని ఏమేరకు ప్రదర్శించగలడో వేచి చూడాల్సిందే!

AS