ప్యారడైజ్ లో సందడి చేసిన మాస్టర్ బ్లాస్టర్

Posted: 07/25/2014 06:01 PM IST

భారత దిగ్గజ బ్యాట్స్ మెన్ మాస్టర్ బ్లాస్టర్ సచిన్ టెండూల్కర్ శుక్రవారంనాడు హైదరాబాద్ నగరంలో సందడి చేశారు. ముఖ్యంగా ఈయన సికింద్రాబాద్ లో వున్న ప్యారడైజ్ హోటల్ లో టిఫిన్ తిని, ఇరానీ చాయ్ తాగారు. కాగా సచిన్ రాక గురించి తెలుసుకున్న స్థానికులు, అభిమానులు ప్యారడైజ్ వద్ద పెద్దఎత్తున బారులు తీరారు. పోలీసులు సైతం వీరిని అదుపు చేయలేకపోయారు. దీంతో కొద్దిసేపటి వరకు ఆ ప్రదేశంలో సందిగ్ధత ఏర్పడింది.

కొద్దిసేపటి తరువాత పోలీసు బలగాలు అభిమానులను కంట్రోల్ చేయడంతో పరిస్థితి సాధారణ స్థితికి చేరుకుంది. ఈ సందర్భంగా ఆయన అభిమానులకు తన మీద కనబరుస్తున్న ప్రేమకు, అభిమానానికి థ్యాంక్స్ చెప్పుకున్నారు. ఆ సమయంలోనే కొంతమంది అభిమానులతోపాటు పోలీసులు కూడా సచిన్ తో ఫోటోలు దిగారు. ప్యారడైజ్ హోటల్ యాజమాన్యం ఆహ్వానం మేరకు సచిన్ ఇక్కడకు విచ్చేసినట్లు ఆయన తెలిపారు.

గతంలో కూడా ఈ ప్యారడైజ్ హోటల్ ఆహ్వానం మేరకు ఎంతోమంది రాజకీయ నాయకులు హాజరయ్యారు. అందులో ముఖ్యంగా రాహుల్ గాంధీ హైదరాబాద్ పర్యటనలో భాగంగా ప్యారడైజ్ బిర్యానీ రుచి చేశారు. అలాగే ఎంపీలు ప్రియాదత్, జ్యోతిరాదిత్య సింధియా, సచిన్ పైలట్ వంటి తదితర ప్రముఖులు కూడా ఈ హోటల్ బిర్యానీ రుచి చూసినవారే! ఏదేమైనా సచిన్ రాకతో అభిమానులు మాత్రం సందడి చేసుకుంటున్నారు.

AS