సానియా జోడి ఖాతాలో గాంగ్జూ ఓపెన్ మహిళల డబ్సుల్ టైటిల్

Posted: 09/26/2015 06:33 PM IST

Sania mirza martina hingis win guangzhou open title

మార్టినా హింగిస్-సానియా మీర్జా మంచి జోరుమీదున్నారు. ఈ ఏడాది వీరికి అత్యద్భుతంగా కలసివస్తుంది. వీరిద్దరి మధ్య అద్భుతమైన సమన్వయం కుదిరడంతో వరుస టైటిళ్లను సాధిస్తూ ఈ జోడి దూసుకుపోతోంది. వింబుల్డన్, యూఏస్ ఓపెన్ టైటిళ్లు గెలుచుకున్న తరువాత, తాజాగా వీరిద్దరూ చైనాలోని గాంగ్జూ ఓపెన్ మహిళల డబుల్స్ టైటిల్ ను సోంతం చేసుకున్నారు. గ్యాంగ్‌జూ డబ్ల్యుటిఎ టెన్నిస్ ఫైనల్లో ఈ జోడీ విజయం సాధించింది. శనివారం జరిగిన మ్యాచులో ఈ జోడీ 6-3, 6-1 తేడాతో అన్ సీడెడ్ క్రీడాకారిణులు షిలిన్ యూ - జూ యూ (చెైనా) జోడీపై గెలిచింది.

ఏకపక్షంగా సాగిన ఈ మ్యాచులో సానియా జంట 58 నిమిషాల్లోనే తుది పోరు ముగించి మరోసారి తన సత్తాను చాటుకుంది. ఈ టైటిల్‌తో ఈ ఏడాది సానియా ఏడు టైటిల్స్‌ను సాధించింది. ఇందులో ఆరు మార్టినా హింగిస్‌తో కాగా, మరోటి బెతాని మాటెక్ సాండ్స్‌ (అమెరికా)తో కలిసి సాధించింది. ఈ ఏడాది మార్చి నుంచి సానియా, హింగిస్ జోడీ కట్టి అనూహ్యమైన విజయాలు సొంతం చేసుకుంటున్నారు. గ్రాండ్ స్లామ్ టోర్నమెంట్స్ వింబుల్డన్, యుఎస్ ఓపెన్ టైటిల్స్ కూడా ఈ జోడీ గెలుచుకుంది. మహిళా డబుల్స్‌లో సానియా మీర్జా ఈ ఏడాది ఏప్రిల్ నుంచి నెంబర్ వన్ స్థానంలో కొనసాగుతోంది.

జి. మనోహర్