దిగ్విజయ్ రాక- బాబు నోరుమూసుకో : దానం

Posted: 12/12/2013 03:44 PM IST

ఈరోజుతో శీతకాలం అసెంబ్లీ సమావేశాలు ప్రారంభమైనాయి. ఇప్పుడు రాష్ట్ర ప్రజల ద్రుష్టి మొత్తం అసెంబ్లీ మీదే ఉంది. ఈరోజు ఏఐసీసీ రాష్ట్ర వ్యవహారాల ఇన్‌చార్జ్ దిగ్విజయ్ సింగ్‌తో పాటు కార్యదర్శులు తిరునావుక్కరసు, కుంతియాలు నగరానికి చేరుకోనున్నారు. రెండ్రోజుల పాటు ఇక్కడే మకాం వేయనున్నారు. శుక్రవారం రాత్రి తిరిగి ఢిల్లీకి వెళతారని పార్టీవర్గాలు చెబుతున్నాయి.

 

సమైక్యవాదం వినిపిస్తున్న వైఎస్సార్ కాంగ్రెస్‌కు మద్దతు పెరుగుతున్న నేపథ్యంలో సొంత పార్టీ నేతలతో పాటు విభజనకు సహకరిస్తున్న ఇతర పార్టీల నాయకులతో దిగ్విజయ్ ఈ రెండ్రోజులూ చర్చలు సాగించనున్నారని తెలిసింది. విభజన బిల్లుపై చర్చ సాఫీగా, సజావుగా ముగింపచేసి ఎక్కువమంది మద్దతు పలికేలా సీమాంధ్ర కాంగ్రెస్ నేతలతో మంతనాలు చేయనున్నారు.

 

దానం ఫైర్

రాష్ట్ర కాంగ్రెస్ వ్యవహారాల ఇన్ ఛార్జ్ దిగ్విజయ్ సింగ్ ను సమైక్యవాదులు అడ్డుకోవడంపై మంత్రి దానం నాగేందర్ మండిపడ్డారు. ఏపీఎన్జీవో అధ్యక్షుడు అశోక్ బాబు నోరు అదుపులో పెట్టుకుంటే మంచిదని సూచించారు. దిగ్విజయ్ సింగ్ ను గోబ్యాక్ అనడానికి అశోక్ బాబు ఎవరంటూ మంత్రి దానం ప్రశ్నించారు. అశోక్ బాబు ఒక ఉద్యోగ సంఘం నేతగా వాళ్ల సమస్యలనే ప్రస్తావించాలే కానీ ఇష్టానుసారంగా మాట్లాడితే తగిన బుద్ధి చెబుతామని దానం అన్నారు. హైదరాబాద్ పై అందరికి సమానంగా హక్కు ఉందని దానం అన్నారు.

 

మాజీమంత్రి జేసీ దివాకర్ రెడ్డి .. .పార్టీ అధినేత్రి సోనియాగాంధీపై చేసిన వ్యాఖ్యలను ఆయన ఖండించారు. పార్టీలో కీలక పదవులు పొందిన జేసీ ఇప్పుడు సోనియాను విమర్శించటం తగదన్నారు. ఎవరైనా సోనియాని విమర్శిస్తే సహించేది లేదని ఆయన హెచ్చరించారు.