చిరు-కొరటాల సినిమాకు బ్రేక్.?

Posted: 01/21/2019 08:02 PM IST

మెగాస్టార్ చిరంజీవి ప్రస్తుతం తన మెగా ప్రాజెక్ట్ సైరా నరసింహరెడ్డి చిత్ర ఘూటింగ్లో బిజీగా వున్నారు. అయితే ఈ చిత్రం తరువాత ప్రముఖ దర్శకుడు కొరటాల శివ కాంబినేషన్లో ఓ సినిమా రాబోతున్న విషయం కూడా పాఠకులకు, మెగా అభిమానులకు తెలిసిందే. కొణిదెల ప్రొడక్షన్‌ కంపెనీ, మాట్నీ ఎంటర్‌టైన్‌మెంట్స్‌ సంస్థలు సంయుక్తంగా ఈ సినిమాను నిర్మించనున్నాయి. ప్రస్తుతం ఈ సినిమా ప్రీ ప్రొడక్షన్‌ పనులు జరుగుతున్నాయి. ఇందులో కథానాయిక ఎవరో తెలియాల్సి ఉంది.

కాగా కొన్ని కారణాల వల్ల ఈ చిత్రం పనులు ఆగిపోయాయని ఇటీవల వార్తలు వచ్చాయి. స్క్రిప్టులో కొన్ని మార్పులు చేయాలని కొరటాలను చిరు అడిగినట్లు రాశారు. ఈ వార్తల్ని నిర్మాణ సంస్థలు సోమవారం ఖండించాయి. సినిమా ప్రీ ప్రొడక్షన్‌ పనులు శరవేగంగా జరుగుతున్నాయని పేర్కొన్నాయి. ప్రతిష్ఠాత్మకంగా ఈ సినిమాను తీసేందుకు చిరు, కొరటాల సన్నాహాలు చేస్తున్నట్లు చెప్పాయి.

‘సైరా నరసింహారెడ్డి’ సినిమాకు సురేందర్‌ రెడ్డి దర్శకత్వం వహిస్తున్నారు. కొణిదెల ప్రొడక్షన్‌ కంపెనీ పతాకంపై మెగాపవర్ స్టార్ రామ్ చరణ్‌ తేజ్ సినిమాను నిర్మిస్తున్నారు. నయనతార, తమన్నా, అమితాబ్ బచ్చన్‌, విజయ్‌ సేతుపతి, జగపతిబాబు తదితరులు ఇందులో కీలక పాత్రలు పోషిస్తున్నారు. ఈ ఏడాది దసరాకు ఈ చిత్రం ప్రేక్షకుల ముందుకు తీసుకురావాలని చిత్ర నిర్మాణ యూనిట్‌ ప్రయత్నిస్తోంది.