సైరా విడుదలను ప్రభావితం చేస్తున్న సెంటిమెంట్.?

Posted: 05/08/2018 05:19 PM IST

తెలుగు సినీ పరిశ్రమలో సెంటిమెంటుకు చాలా ప్రాధాన్యముందన్న విషయం అందరికీ తెలిసిందే. తాజాగా మెగాస్టార్ చిరంజీవి రీఎంట్రీ తరువాత రెండో సినిమాను భారీ బడ్జట్ తో చారిత్రక నేపథ్యమున్న చిత్రాన్ని రూపొందిస్తున్న విషయం తెలిసిందే. అయితే ఈ చిత్రాన్ని కూడా సెంటిమెంట్ బలంగా వెంటాడుతుందని టాక్. చిరంజీవి అభిమానులు ఎప్పుడెప్పుడా అని ఎదురుచూస్తున్న సైరా చిత్రం.. కోసం అభిమానులు మరో ఏడాది అగాల్సిందేనన్న చేదు వార్త ప్రస్తుతం చిత్రపురి వర్గాల్లో చక్కర్లు కొడుతుంది.

సురేందర్ రెడ్డి దర్శకత్వంలో రూపోందుతున్న ఈ చిత్రానికి మెగా పవర్ స్టార్ రాం చరణ్ తేజ్ నిర్మాతగా వ్యవహరిస్తున్నారు. ఈ చిత్రానికి సంబంధించి తొలి షెడ్యూల్డును ఇప్పటికే పట్టాలెక్కింది. అయితే ఈ షెడ్యూలు ముగించడంలో మాత్రం.. వరుస షూటింగ్లకు బ్రేకులు పడుతున్నాయని టాక్. దీంతో ఇక వచ్చే ఏడాది విడుదల కోసం ఇప్పటి నుంచే ప్లాన్ చేసుకుంటున్నారట సినిమా నిర్మాణ వర్గాలు. అందుకునే సురేందర్ రెడ్డి ఈ సినిమా షూటింగు వేగాన్ని పెంచినట్టుగా ఒక టాక్ వినిపిస్తోంది. ఇప్పటికే ప్రధాన పాత్రలకి సంబంధించిన కొన్ని ముఖ్యమైన సన్నివేశాలను చిత్రీకరించారు.

 ఈ సినిమా గ్రాఫిక్స్ వర్క్ కి కూడా చాలా సమయం పట్టనుందట. అందువలన ఆ వైపు నుంచి కూడా పనులను వేగవంతం చేసేలా ప్లాన్ చేస్తున్నారని అంటున్నారు. ఈ సినిమాను వచ్చే ఏడాది మే 9వ తేదీన విడుదల చేయాలని దర్శక నిర్మాతలు భావిస్తున్నారని చెప్పుకుంటున్నారు. గతంలో చిరంజీవి చేసిన 'జగదేకవీరుడు అతిలోక సుందరి' .. 'గ్యాంగ్ లీడర్' సినిమాలు ఇదే రోజున విడుదలై సంచలన విజయాలను అందుకున్నాయి. ఆ సెంటిమెంట్ ను దృష్టిలో పెట్టుకుని అదే రోజున విడుదల చేస్తే బాగుంటుందనే నిర్ణయానికి వచ్చారట. ఈ విషయాన్ని దృష్టిలో పెట్టుకుని పనులు పూర్తయ్యేలా చూడాలని నిర్ణయించుకున్నట్టుగా సమాచారం.