భన్సాలీతో దీపిక-రణ్ వీర్.. మరో మూడు చిత్రాలు?

Posted: 02/15/2018 06:51 PM IST

బాలీవుడ్ భారీ సెట్టింగుల దర్శకుడు సంజయ్ లీలా భన్సాలీకి రణ్ వీర్ -దీపికలంటే ప్రత్యేక అభిమానం ఉంది. అందుకే వరుసగా తన చిత్రాల్లో ఈ లవ్ బర్డ్స్ నే రిపీట్ చేస్తూ వస్తున్నాడు. రామ్ లీలా, బాజీరావ్ మస్తానీ, పద్మావత్ చిత్రాలు చేశాడు. అయితే పద్మావత్ ఎఫెక్ట్ మూలంగా ఇక ముందు ఆయనతో సినిమాలు చేసేందుకు వీరిద్దరూ సుముఖంగా లేరనే ఓ వార్త ఆ మధ్య చక్కర్లు కొట్టింది.

కానీ, అదే వార్తను ఖండిస్తూ బాలీవుడ్‌లో ఇపుడు మరో వార్త చక్కర్లు కొడుతోంది. వారిద్దరూ కలిసి ఆయన దర్శకత్వంలోనే మరో మూడు చిత్రాల్లో నటించనున్నారట. దీనికి సంబంధించి వారి మధ్య డీల్ కూడా కుదిరిందని బాలీవుడ్ ట్రేడ్ ఇన్‌సైడర్ ఒకరు చెప్పినట్లు 'ఆసియన్ ఏజ్' అనే పత్రిక ఉటంకించింది. వారిద్దరి నటన మాత్రమే కాక ప్రొఫెషన్ పట్ల వారి అంకితభావానికి ఆయన ఫిదా అయిపోయారని, అందుకే వారితో మళ్లీ కలిసి పనిచేయాలని ఆయన డిసైడ్ అయ్యారని ఆ కథనం పేర్కొంది. మరో ఆరేళ్లలో ఆ మూడు చిత్రాలు రానున్నాయనే తెలుస్తోంది.

పద్మావత్ సినిమా షూటింగ్‌కు, ఆ చిత్రం విడుదలకు అడ్డంకులు ఎదురైనప్పుడు వారు ఎంతో సహనంతో సహకరించడం భన్సాలీకెంతో నచ్చిందట. అందువల్ల వారిద్దరితో ఆరేళ్ల పాటు మూడు సినిమాలకు ఆయన డీల్ కుదుర్చుకున్నారని తెలుస్తోంది. మరోవైపు షారూఖ్, సల్మాన్ లాంటి టాప్ స్టార్లతో చెయ్యకూడదని భన్సాలీ ఫిక్సయ్యాడని తెలుస్తోంది.