భరత్ అను నేను రిలీజ్ డేట్ మారుతోందా?

Posted: 12/05/2017 11:34 AM IST

మహేష్ బాబు 'భరత్ అను నేను', అల్లు అర్జున్ 'నా పేరు సూర్య' లతో రజనీకాంత్ నటించిన రోబో సీక్వెల్ 2.O చిత్రాలు ఒకేసారి పోటీ పడబోతున్నాయన్న వార్త గత కొంత కాలంగా చక్కర్లు కొడుతున్న విషయం తెలిసిందే. వీటి విషయమై చర్చ కూడా జరుగుతోంది. మహేష్, బన్నీ ఒకేరోజు రావాలనుకోవటం.. పైగా రజనీది భారీ బడ్జెట్ చిత్రం కావటంతో కలెక్షన్లపై తీవ్ర ప్రభావం పడే అవకాశం ఉందని విశ్లేషకులు అభిప్రాయపడ్డారు.

అయితే మహేష్ చిత్ర మేకర్లు ఇప్పుడు ఆలోచనల్లో పడినట్లు తెలుస్తోంది. కలెక్షన్ల విషయంలో తీవ్ర అన్యాయం జరుగుతుందన్న సత్యాన్ని గమనించిన కొరటాల శివ టీమ్, పోటీ నుంచి తప్పుకుందని ఫిల్మ్ నగర్ వర్గాల టాక్. 'భరత్ అను నేను' చిత్రాన్ని కనీసం రెండు వారాల ముందుగానే విడుదల చేయాలని నిర్ణయించుకున్నారంట. ఈ మేరకు పోస్ట్ ప్రొడక్షన్ పనులను వేగవంతం చేసిందని టాలీవుడ్ వర్గాల సమాచారం. అంటే ముందుగా అనుకున్న ఏప్రిల్ 27న కాకుండా, 13వ తేదీనే విడుదల చేయాలని నిర్ణయించుకున్నట్టు వార్తలు వినిపిస్తున్నాయి.

ఈ విషయంపై భరత్ అను నేను-నా పేరు సూర్య చిత్రాల నిర్మాతలు మాట్లాడుకుని సమస్యను పరిష్కరించుకున్నారని కూడా తెలుస్తోంది. 2.O మేకర్లు ఏప్రిల్ లోనే రిలీజ్ ఖాయమని ప్రెస్ నోట్ రిలీజ్ చేసినప్పటికీ.. తేదీని మాత్రం ప్రకటించలేదు. ఈ నేపథ్యంలో ఆ చిత్రం అటు ఇటు అయితే సూపర్ స్టార్ వర్సెస్ సూపర్ స్టార్ అయ్యే అవకాశాలే ఎక్కువగా కనిపిస్తున్నాయి.