డ్రగ్స్ కేసులో ఒత్తిళ్లు మొదలయ్యాయా?

Posted: 07/26/2017 01:05 PM IST

Political pressures begin in drug case probe

కేవలం టాలీవుడ్ నే టార్గెట్ చేస్తూ ఇండస్ట్రీ పరువు తీస్తున్నారంటూ తెలంగాణ ఎక్సైజ్ శాఖపై తీవ్ర విమర్శలు చేస్తున్నారు పలువురు ప్రముఖులు. వాళ్లకీ కుటుంబాలు ఉంటాయని, వార్తలు ప్రచురించే ముందు కాస్త ఆలోచించండంటూ మీడియాకు విజ్నప్తి చేస్తున్నారు. సిట్ విచారణ నేపథ్యంలో తీవ్ర విమర్శలు వస్తుండటంతో ఆగష్టు 2వరకు ఎవరికీ ఎలాంటి నోటీసులు ఉండబోవని అధికారులు చెబుతున్నారు. అయితే తర్వాత కూడా అది జరగకపోవచ్చనే సంకేతాలు అందుతున్నాయి.

సిట్ ఫస్ట్ లిస్ట్ లో 12 మంది సినీ ప్రముఖులకు నోటీసులు ఇచ్చి, వారందరినీ విచారిస్తోంది. ఈ మధ్యలో వారి నుంచి సేకరించిన సమాచారంతోనే రెండో జాబితాను కూడా తయారు చేసిందంట. ఇందులో అందరి నుంచి కామన్ గా వినిపించిన ఓ అగ్రనిర్మాత కుమారుల పేర్లు, మరో హీరో, ఇద్దరు టాప్ హీరోయిన్లు, సాంకేతిక నిపుణుల పేర్లు కూడా ఉన్నట్లు లీకులు అందాయి. అయితే ప్రస్తుత పరిణామాల నేపథ్యంలో పలువురు సినీ పెద్దలు రంగంలోకి దిగారు.

ఇంతకు ముందు ధైర్యంగా విచారణ జరపండంటూ చెప్పిన అదే పెద్దలు సినీ పరిశ్రమ పరువు మరింత దిగజారకుండా ఉండాలంటే రెండో జాబితా నోటీసులు ఆపాలని ప్రభుత్వాన్ని కోరారంట. ప్రభుత్వంతో సన్నిహితంగా ఉండే ఓ బడా నిర్మాతతో పాటు, గతంలో హీరోగా, ఇప్పుడు విలన్ గా వైవిధ్యమైన పాత్రలు ధరించి మెప్పిస్తున్న నటుడు పరిశ్రమ తరఫున ప్రభుత్వంతో రాయబారం నడపినట్లు భోగట్టా. తదుపరి విచారణే జరిగితే మాత్రం టాలీవుడ్ మరింత దిగజారుతుందని, ఇండస్ట్రీలో పని చేసేవాళ్ల మనోస్ధైర్యం దెబ్బతింటుందని వీరు చర్చించినట్టు తెలుస్తోంది.

దీంతో టీఆర్ఎస్ సర్కారు మెత్తబడినట్టు సమాచారం. ఒకవేళ విచారణ కొనసాగినప్పటికీ లీకులు గీకులు లేకుండా ముందుకు సాగాలని టాలీవుడ్ తరపున రిక్వెస్ట్ వెళ్లిందంట.ఇప్పటికే ఎక్సైజ్ అధికారులకు ప్రభుత్వం నుంచి కొన్ని సంకేతాలు వెళ్లగా, ఇకపై నోటీసులు వెళ్లటం కొంచెం అనుమానమే అనిపిస్తోంది.