ఉయ్యలవాడ టైటిల్ మార్పు ఉందా? లేదా?

Posted: 07/17/2017 04:38 PM IST

మెగాస్టార్ చిరంజీవి చిరంజీవి 151వ సినిమాగా తెరకెక్కబోతున్న 'ఉయ్యాలవాడ నరసింహా రెడ్డి' స్క్రిప్ట్ తాను పూర్తిగా చదివానని, అద్భుతంగా ఉందని విలక్షణ దర్శకుడు సుకుమార్ ప్రశంసలు కురిపించిన విషయం తెలిసిందే. దీంతో ఇంత కాలం వెయిట్ చేసినందుకు ఓ సంతృప్తికరమైన సినిమానే మెగా స్టార్ అందించబోతున్నాడని ఫ్యాన్స్ హ్యాపీగా ఫీలయ్యారు. అయితే ఇంతలోనే ఎక్కడి నుంచి పుట్టుకొచ్చిందో తెలీదుగానీ ఓ వార్త మాత్రం ఇప్పుడు తెగ వైరల్ అవుతోంది. అదే సినిమా టైటిల్ మారుతుందని...

ఉయ్యలవాడ పేరును మహావీర గా మార్చాలన్న ఆలోచనలో నిర్మాత రాంచరణ్ ఉన్నాడని దాని సారాంశం. అయితే ఆ వార్త నిజం కాదనే సంకేతాలు అందుతున్నాయి. డ్రీమ్ ప్రాజెక్టు విషయంలో అస్సలు కాంప్రమైజ్ అయ్యేందుకు చిరుయే సిద్ధంగా లేడన్న టాక్ వినిపిస్తోంది. కేవలం మిగతా భాషల్లో రిలీజ్ చేయాలన్న ఒకే ఒక్క కారణంతో ఆ పోరాట యోధుడి బయోపిక్ టైటిల్ మార్చేస్తే విమర్శలు ఎదురయ్యే అవకాశం ఉందని చిరు భావిస్తున్నాడంట. అందుకే తెలుగులో అదే పేరుతో ఉండి, అవసరమైతే మిగతా భాషల్లో టైటిల్ ఛేంజ్ చేసేలా ఫ్లాన్ చేసుకుంటున్నాడని తెలుస్తోంది.

ఇక స్వయంగా మెగా తనయుడు చెబితేనే ఏదైనా అఫీషియల్ అవుతుందని, ఇంతవరకు ఎలాంటి ప్రకటన లేదు కాబట్టి ఫేక్ న్యూస్ అని మెగా అభిమానులు కూడా చెబుతున్నారు. గతంలో ఖైదీ నంబర్ 150 విషయంలో కూడా ఇలాంటి రూమర్లే చాలా వినిపించాయి కూడా. ఆ లెక్కన్న టైటిల్ ఛేంజ్ విషయం గాలి వార్త కిందే జమకట్టేయొచ్చు.

ఆగష్టు మూడో వారంలో చిత్ర షూటింగ్ ప్రారంభించి సమ్మర్ లో ఉయ్యలవాడను ప్రేక్షకుల ముందుకు తీసుకురానున్నారు. నయనతార హీరోయిన్ గా దాదాపు ఖరారయ్యే అవకాశం ఉంది.