ప్రభాస్ బాలీవుడ్ డెబ్యూ ఫిక్స్??

Posted: 04/18/2017 01:19 PM IST

పరభాషలపై మన హీరోలు ఇప్పుడిప్పుడే గురి పెట్టేస్తున్నారు. ఇంతకాలం కేవలం డబ్బింగ్ తోనే సరిపెట్టినప్పటికీ ఇక నుంచి స్ట్రెయిట్ మూవీస్ చేసేందుకు సిద్ధమైపోయారు. మహేష్, అల్లు అర్జున్ ఇప్పటికే తమిళ్ లో పాగా వేసేందుకు రెడీ అయిపోయారు కూడా. అయితే బాలీవుడ్ లో మాత్రం టాలీవుడ్ స్టార్ హీరోల తాకిడి లేదనే చెప్పుకోవాలి. అప్పుడెప్పుడో చిరు, నాగ్, వెంకీ లాంటి వాళ్లు ప్రయోగాలు చేసి మిశ్రమ ఫలితాలను రాబట్టాక మళ్లీ ఆవైపు కన్నెత్తి చూసిన తెలుగు హీరోలు లేరు. ఆ మధ్య జంజీర్ తో రాంచరణ్ దారుణంగా దెబ్బతిన్నాడు. ప్రస్తుతం ఉన్నవారిలో ఒక్క రానా తప్ప ఇంకెవ్వరూ బాలీవుడ్ లో ఎస్టాబ్లిష్ అయ్యే ప్రయత్నాలు చేయటం లేదు.

మరి బాహుబలితో రేంజ్ పెంచేసుకున్న ప్రభాస్ పరిస్థితి ఏంటి? నిజానికి బాహుబలి కంటే ముందు యాక్షన్ జాక్సన్ లో ఓ బిట్ లో కనిపించిన ప్రభాస్ బాలీవుడ్ హీరో ఆరంగ్రేటంపై గత మూడేళ్లుగా చర్చలు జరుగుతూనే వస్తున్నాయి. బాహుబలి 2 రిలీజ్ అవుతుండటంతో అక్కడ ప్రమోషన్లో బిజీగా ఉన్న ప్రభాస్ కి మళ్లీ ఇదే ప్రశ్న ఎదురవుతుండగా, సింపుల్ గా నవ్వుతోనే సమాధానం ఇస్తున్నాడు. ఈ క్రమంలో ఓ న్యూస్ ఇప్పుడు అక్కడ మీడియాలో బాగా నానుతోంది.

రాజమౌళితో డైరెక్ట్ హిందీ సినిమా చేయించాలన్నది టాప్ మేకర్ కరణ్ జోహార్ ఆలోచన. చాలాసార్లు ఈవెంట్లలో కూడా ఇదే విషయాన్ని కరణ్ స్వయంగా చెప్పాడు. అయితే అదేదో ప్రభాస్ తోనే చేయిస్తే బావుంటుంది కదా అన్న ఓ అంచనాకు వచ్చాడని అక్కడి మీడియా కోడై కూస్తోంది. ఓ మాంచి మాస్ సబ్జెక్ట్ తోనే డార్లింగ్ ను లాంఛ్ చేయించాలని కరణ్ బలంగా ఫిక్సయ్యాడని, ఇందు కోసం రాజమౌళిని కథ ప్రిపేర్ చేయాల్సిందిగా సూచించాడని ఇలా అందులో ఉంది. అంటే కరణ్ జోహార్ నిర్మాతగా వ్యవహరిస్తున్న మూవీకి జక్కన్న డైరక్టర్ కాగా, ప్రభాస్ హీరో అన్న మాట. ఇప్పట్లో సమాధానం లేని ఈ ప్రశ్న ఆచరణలోకి రావాలంటే చాలా సమయమే పట్టొచ్చు. అప్పటిదాకా ఇలా ఊహగానాలతో గడిపేయటమే.